ჩვენ ვაცხადებთ, რომ ცესკო რა მონაცემებსაც გამოაქვეყნებს, იმ მონაცემებს გავყვებით. იგივე კითხვაზე ოპოზიციისგან ვერცერთ შემთხვევაში ვერ მიიღეს დადებითი პასუხი, რაც ნიშნავს იმას, რომ მათ გაუჭირდებათ შეეგუონ მძიმე მარცხს, მეცხრე მარცხს ამ 12-წლიანი ისტორიის მანძილზე, – განაცხადა პრემიერ-მინისტრმა ირაკლი კობახიძემ „ქართული ოცნების“ ცენტრალურ ოფისში გამართულ ბრიფინგზე.
კობახიძეს ჰკითხეს, რას ფიქრობს იმაზე, რომ ოპოზიცია ამომრჩევლის აქტივობას საკუთარ გამარჯვებად აცხადებს. რატომ მოუწოდებს ხელისუფლება და მათ შორის თავადაც რამდენჯერმე რატომ მოუწოდა ოპოზიციას აღიაროს არჩევნების შედეგები, ხომ არ აქვს რაიმე ინფორმაცია რისთვის შეიძლება ემზადებოდნენ ოპონენტები.
„მე ვუსმენდი ერთ-ერთი მათი [ოპოზიციის] ლიდერის გამოსვლას. გვარამია გამოდიოდა. მაინცდამაინც დიდი რიხი არ ეტყობოდა ხმაში. ერთი რაც წამოსცდა, იყო ის, რომ დღის პირველ ნახევარში აქვს „ქართულ ოცნებას“ ამომრჩევლის მობილიზება დაგეგმილი და მეორე ნახევარში ჩვენი შედეგები გაუმჯობესდებაო. ეს წამოცდენა იყო. რეალურად ჩვენ რა თქმა უნდა უზრუნველვყოფთ ამომრჩევლის მობილიზაციას მთელი დღის განმავლობაში და „ქართული ოცნება“ იქნება მთავარი პოლიტიკური ძალა, რომელიც უზრუნველყოფს მაღალ აქტივობას ამ არჩევნებზე. ეს არის პრინციპულად მნიშვნელოვანი. რაც მეტი ამომრჩეველი მოვა ამ არჩევნებზე, მით უფრო მყარი იქნება სტაბილური პროცესების განვითარება ჩვენს ქვეყანაში.
რაც შეეხება ცესკო-ს მიერ გამოქვეყნებული შედეგების აღიარებას, ერთ-ერთი პრინციპული განსხვავება ჩვენსა და ოპოზიციას შორის მთელი ამ წლების განმავლობაში არის ის, რომ ჩვენ ყოველთვის მივყვებოდით ცესკო-ს მიერ გამოცხადებულ შედეგებს და ოპოზიცია არასოდეს აღიარებდა მას. ამ გამოცდილების გათვალისწინებით ეს საკითხი ყოველთვის არის აქტუალური. კიდევ ერთხელ უნდა დავსვათ კითხვა რადიკალური ოპოზიციის წინაშე, ამ შემთხვევაში მაინც აღიარებენ თუ არა ცესკო-ს მიერ ოფიციალურად გამოცხადებულ შედეგებს. ეს კითხვები რამდენადაც ვიცი, მათ დაუსვეს საერთაშორისო დამკვირვებლებმაც და ვერცერთ შემთხვევაში ვერ მიიღეს დადებითი პასუხი. ამ კითხვას ჩვენც გვისვამდნენ საერთაშორისო დამკვირვებლები გვეკითხებოდნენ იქნებოდა თუ არა ნებისმიერი შედეგი მისაღები ჩვენთვის.
ჩვენ ვაცხადებთ, რომ ცესკო რა მონაცემებსაც გამოაქვეყნებს, იმ მონაცემებს გავყვებით. იგივე კითხვაზე ოპოზიციისგან ვერცერთ შემთხვევაში ვერ მიიღეს დადებითი პასუხი, რაც ნიშნავს იმას, რომ მათ გაუჭირდებათ შეეგუონ მძიმე მარცხს, მეცხრე მარცხს ამ 12-წლიანი ისტორიის მანძილზე. მათი გადასაწყვეტი არ იქნება ეს ყველაფერი. საბოლოო ჯამში, რეალურად გაფორმდება ლეგიტიმური არჩევნების შედეგები, რომელიც გამოქვეყნდება ერთ-ერთი ყველაზე მაღალი ნდობით აღჭურვილი ინსტიტუტის, ცესკო-ს მიერ და საბოლოო ჯამში, ყველას მოუწევს შეეგუოს იმ შედეგს, რომელიც დაფიქსირდება ქართველი ხალხის გადაწყვეტილების სახით“, – აღნიშნა კობახიძემ.