“ნაცმოძრაობის“ ხობის ორგანიზაციის თავმჯდომარემ ვიტალი ყორშიამ “ქართული ოცნების“ კოორდინატორ ნათია გაბისონიას სახის არეში ხელი დაარტყა”

„ქართული ოცნების“ დეპუტატი, გივი მიქანაძე პარტიის ცენტრალურ ოფისში გამართულ ბრიფინგზე ხობში მომხდარ ინციდენტს გამოეხმაურა.

როგორც მან აღნიშნა, „ერთიანი ნაციონალური მოძრაობის“ ხობის ორგანიზაციის თავმჯდომარეს შელაპარაკება მოუვიდა „ქართული ოცნების“ კოორდინატორთან, რა დროსაც ვიტალი ყორშიამ ნათია გაბისონიას სახის არეში ხელი დაარტყა.

„გვინდა გამოვეხმაუროთ ხობში მომხდარ ინციდენტს. ხობის N1 საარჩევნო უბანში მისული იყო „ერთიანი ნაციონალური მოძრაობის“ ხობის ორგანიზაციის თავმჯდომარე ვიტალი ყორშია, რომელსაც შელაპარაკება მოუვიდა „ქართული ოცნების“ კოორდინატორ ნათია გაბისონიასთან. ვიტალი ყორშიამ ნათია გაბისონიას სახის არეში დაარტყა ხელი და ეს კონკრეტული ინციდენტი მოხდა საარჩევნო უბანთან განთავსებულ მიკროავტობუსში. მოხდა მყისიერი რეაგირება, 112-ში შევიდა შესაბამისი განცხადება და პოლიციამ უკვე განახორციელა საკითხის შესწავლა და ამ საკითხის მსვლელობას რა თქმა უნდა მივადევნებთ თვალს“, – განაცხადა გივი მიქანაძემ.