მადლობა ჩვენს ამომრჩევლებს მათი ერთგულებისთვის ამდენი წლის განმავლობაში – ჩვენ ძალიან ბევრი რამ განვახორციელეთ ამდენი წლის განმავლობაში, მაგრამ ასევე გვაქვს ძალიან ამბიციური გეგმები შემდეგი 4 წლისთვის, – განაცხადა თავდაცვის მინისტრმა ირაკლი ჩიქოვანმა „იმედი LIVE“-ში.
„ეს არის ძალიან მნიშვნელოვანი გამარჯვება. პირველ რიგში მინდა მივულოცო საქართველოს ყველა მოქალაქეს და საქართველოს. დღეს მივიღეთ გადაწყვეტილება, რომელიც მიიღო ქართველმა ხალხმა, საქართველომ და გადაწყვიტეს, რომ გაგვეგრძელებინა განვითარების გზა. გზა, რომელიც ასე მნიშვნელოვანია ჩვენი ქვეყნის განვითარებისთვის, მნიშვნელოვანია იმისათვის, რომ შევინარჩუნოთ მშვიდობა და რა თქმა უნდა, გავაუმჯობესოთ ის პირობები და ყოფა, რომელიც აქვს ჩვენს თანამოქალაქეებს. მადლობა მინდა გადავუხადო ჩვენს ამომრჩევლებს, რომელმაც მხარდაჭერა გამოგვიცხადა, მადლობა მათი ერთგულებისთვის ამდენი წლის განმავლობაში. რა თქმა უნდა, ჩვენ ძალიან ბევრი რამ განვახორციელეთ ამდენი წლის განმავლობაში, მაგრამ ასევე გვაქვს ძალიან ამბიციური გეგმები შემდეგი 4 წლის განმავლობაში. დარწმუნებული ვარ ჩვენ ღირსეულად წარვდგებით ჩვენი ამომრჩევლის წინაშე და ღირსეულად შევასრულებთ ჩვენს ყველანაირ დაპირებას“, – აღნიშნა ჩიქოვანმა.
მან ასევე ისაუბრა რას ნიშნავდა ეს არჩევნები საქართველოსთვის.
„ეს არჩევნები იყო რეფერენდუმი, რომ ჩვენ უარი გვეთქვა დესტრუქციისთვის, რევოლუციური გეგმებისთვის, იმ ხალხისთვის, ვინც ძალიან ბევრი ტკივილი მიაყენა საქართველოს მოქალაქეებს, განსაკუთრებულად სამეგრელოში. უარი გვეთქვა იმ ადამიანებისთვის, რომლებსაც საერთოდ არ აქვთ წარმოდგენა, თუ რა არის მნიშვნელოვანი საკუთარი სამშობლოსთვის და ისინი მოქმედებდნენ სხვების კარნახით. მე ძალიან ბედნიერი ვარ, რომ საქართველოს ამომრჩეველმა კიდევ ერთხელ დაგვიჭირა მხარი და მოგვცა საშუალება, რომ გავაგრძელოთ და ქვეყანა წავიყვანოთ განვითარებისკენ, მშვიდობით და ღირსეულად ევროპაში გაწევრიანებისკენ“,- განაცხადა ჩიქოვანმა.