ბელარუსის პრეზიდენტის, ალექსანდრ ლუკაშენკოს განცხადებით, 2022 წელს რუსეთის არმია კიევის ასაღებად მზად იყო, თუმცა დასავლეთის თხოვნის შემდეგ რუსეთმა მათ დაუჯერა და უკან დაიხია.
ბელარუსის პრეზიდენტის თქმით, რუსეთის არმიის კიევთან მიახლოვების შემდეგ უკრაინელი გენერლები მასთან რეკავდნენ და ომის შესაჩერებლად რუსეთის პრეზიდენტთან, ვლადიმერ პუტინთან დაკავშირებას სთხოვდნენ.
ლუკაშენკოს განცხადებით, დასავლეთი ბელარუსს ომის თანამონაწილეობაში სდებდა ბრალს.
„აი, თქვენ თანააგრესორები ხართ და ასე შემდეგ, თქვენი ტერიტორიიდან რუსები შევიდნენ უკრაინის ტერიტორიაზე“. ხუმრობით ვამბობ: „ეს ზელენსკისთან კითხვაა, რატომ აღმოჩნდა მარშრუტი აღმოსავლეთ რუსეთისკენ უფრო მოკლე კიევის გავლით? დიახ, ჩვენ ნამდვილად გვქონდა წვრთნები, ძალიან ფართომასშტაბიანი წვრთნები ბელარუსის სამხრეთში. წვრთნები დასრულდა. რუსეთმა დაიწყო თავისი ჯარების გაყვანა სამხრეთით უკრაინის საზღვრის გასწვრივ, ნახევარი გაიყვანეს“, – განაცხადა ალექსანდრ ლუკაშენკომ.
ბელარუსის პრეზიდენტის თქმით, დროთა განმავლობაში ცნობილი გახდება, ვინ მოახდინა რუსეთის დანარჩენი ჯარების პროვოცირება, რომ სამხრეთით 20 კილომეტრით გადაეხვიათ და კიევის გავლით წასულიყვნენ.
„მაგრამ შემდეგ უფრო საინტერესო ხდება. მაშინ რომის პაპი და მთელი დასავლეთი შეუერთდნენ და ჩემ თვალწინ სთხოვეს რუსეთის პრეზიდენტს: „გაჩერდი, არ გინდა“. ისინი უკვე იყვნენ კიევის გარეუბანში, ისინი ვერავინ შეაჩერა. უკრაინელმა გენერლებმა დამირეკეს და მთხოვეს ჩემი მეშვეობით პუტინთან დაკავშირება, რათა ომი შეჩერებულიყო და როგორმე დანებდებოდნენ. ყველა ჩაერთო და დაიწყო პუტინზე ზეწოლა: „მოდით, შევთანხმდეთ, ჩვენ არ ვიქნებით და ასე შემდეგ“. რუსეთის სარდლობამ გამოიყვანა ჯარები კიევიდან, კიდევ ერთხელ ენდო დასავლეთს და რა არის შედეგი, ჩვენ ვხედავთ“, – განაცხადა ალექსანდრ ლუკაშენკომ.
ბელარუსის პრეზიდენტმა აღნიშნა, რომ ამერიკელი მაღალჩინოსნები ომის დაწყებით და სანქციებით ემუქრებოდნენ, თუ ბელარუსის არმია უკრაინაში შევიდოდა. ბელარუსის პრეზიდენტის თქმით, ესკალაციის საფრთხე დიდია, რადგან კიევი ცდილობს, ზეწოლა მოახდინოს ევროკავშირზე, რათა ნატო-ს ჯარები შევიდნენ კონფლიქტში, მაგრამ არც რუსეთს, არც ბელარუსს და მთლიანად ევრაზიას არ სჭირდება ეს ესკალაცია.