ბუდაპეშტში ევროპული საბჭოს არაფორმალური სამიტი დასრულდა.
რადიო „თავისუფლების“ ინფორმაციით, ევროპელმა ლიდერებმა საქართველოს შესახებ მსჯელობა დროის სიმცირის გამო ვერ მოახერხეს. საკითხს ევროკავშირის საგარეო საქმეთა მინისტრები 18 ნოემბერს განიხილავენ.
გამოცემის ცნობით, საქართველოს შესახებ საუბარი არ ყოფილა არც შეხვედრის შემდეგ გამართულ პრესკონფერენციაზე, სადაც გამოვიდნენ ევროპული საბჭოს პრეზიდენტი შარლ მიშელი, ევროკომისიის პრეზიდენტი ურსულა ფონ დერ ლაიენი და უნგრეთის პრემიერ-მინისტრი ვიქტორ ორბანი.
უნგრეთი ამჟამად ევროკავშირის საბჭოს მორიგე პრეზიდენტი ქვეყანაა. სწორედ უნგრეთის დედაქალაქი ბუდაპეშტი მასპინძლობდა 7 ნოემბერს ევროპული თანამეგობრობის სამიტს, სადაც ირაკლი კობახიძეც მონაწილეობდა და ევროკავშირის ქვეყნების ლიდერების შეხვედრასაც, რომელიც 8 ნოემბერს გაიმართა.
„კვირებით ადრე იყო ცნობილი, რომ ევროპულ საბჭოს საქართველოზე უნდა ემსჯელა. ამის შესახებ საბჭოს პრეზიდენტი, შარლ მიშელიც წერდა 6 ნოემბერს, საბჭოს წევრებისთვის გაგზავნილ საჯარო მოწვევაში. როგორც ჩანს, საქართველოს საკითხის განხილვას ევროკავშირის საგარეო საქმეთა მინისტრების საბჭო გადაიბარებს. ისინი 18 ნოემბერს ბრიუსელში შეიკრიბებიან. დღეის მდგომარეობით, საქართველო დღის წესრიგში მეორე საკითხია უკრაინის შემდეგ“, – წერს რადიო „თავისუფლება“.