პოლონეთში მმართველი პარტიის, „სამოქალაქო კოალიციის“ საპრეზიდენტო კანდიდატის ასარჩევად პრაიმერიზი 22 ნოემბერს დაინიშნა. ინფორმაციას ამის შესახებ ადგილობრივი მედია ავრცელებს.
კომიტეტის თავმჯდომარემ, დოროტა ნედზელიამ განაცხადა, რომ 22 ნოემბერს, ადგილობრივი დროით დილის 08:00 საათზე სამოქალაქო კოალიციაში შემავალი პარტიების აქტივისტები ტელეფონზე მიიღებენ შეტყობინებას, რომელშიც განმარტებული იქნება ხმის მიცემის წესი.
„კანდიდატებს მიენიჭებათ ნომრები, ნომერი 1 – რაფალ ტშასკოვსკი, ნომერი 2 არის რადოსლავ სიკორსკი, აქტივისტებს მოუწევთ შეტყობინების სახით მხოლოდ 1 ან 2 ციფრის გაგზავნა“, – განმარტა კომიტეტის ხელმძღვანელმა.
მისივე თქმით, შესაძლებელი იქნება მხოლოდ ერთი შეტყობინების გაგზავნა. შედეგები კი 23 ნოემბერს გამოცხადდება.
„სამოქალაქო კოალიციის“ მიერ არჩეული პრეზიდენტობის კანდიდატი თავის პროგრამას 7 დეკემბერს, სილეზიაში გამართულ პარტიის ყრილობაზე წარადგენს. გამოკითხვები აჩვენებს, რომ „სამოქალაქო კოალიციის“ კანდიდატებს უფრო მეტი მხარდაჭერა აქვთ, ვიდრე პოლონეთის უმსხვილესი ოპოზიციური პარტიის, „კანონისა და სამართლიანობის“ წარდგენილ კანდიდატებს.