რომელი გავლენიანი პოლიტიკოსი მფარველობს ქართველ “კანონიერ ქურდს“?

კრიმინალური ვენდეტა, რომელიც შესაძლოა, ბულგარეთში მცხოვრები ქართველი „კანონიერი ქურდის“ ლიკვიდაციით დასრულდეს. შურისძიება ჯერ კიდევ 1994 წელს მომხდარ კრიმინალურ გარჩევას უკავშირდება, რა დროსაც თბილისელი „კანონიერი ქურდი“ რევაზ გამცემლიძე ჩაცხრილეს. ცხადია, მისი მკვლელობა ქურდულ სამყაროში რეაგირების გარეშე არ დარჩებოდა, მთავარი ეჭვმიტანილი ამ დრომდე საკმაოდ მოხერხებულად უძვრებოდა ქურდულ მართლმსაჯულებას.
ეს ეჭვმიტანილი კი ყოფილი „კანონიერი ქურდი“ გიორგი საყვარელიძეა, რომელმაც ზემოხსენებული მკვლელობის შემდეგ სტატუსიც დაკარგა და ქურდული სამყაროს წევრობის უფლებაც.
გამცემლიძის მკვლელობის გამო საყვარელიძის ლიკვიდაციის მცდელობა არაერთხელ სცადეს, თუმცა ყველა ჯერზე სიკვდილს გადაურჩა. საბოლოოდ ის რუს სამართალდამცავებს უსაფრთხოების გამო თავად ჩაბარდა, სასჯელის მოხდის შემდეგ კი ევროპაში გაუჩინარდა.
უკვე წლებია, გიორგი საყვარელიძე ბულგარეთში ცხოვრობს, სადაც საკმაოდ დიდი სიმდიდრეც დააგროვა. ამ ხნის განმავლობაში ყოფილმა „კანონიერმა ქურდმა“ ბულგარეთის პოლიტიკურ წრეებშიც შეაღწია. ის ხშირად ჩნდება ელიტარულ თავყრილობებზეც, თუმცა, როგორც ჩანს, ეშმაკს არ სძინავს.
გამომდინარე იქიდან, რომ ქურდული მართლმსაჯულება დანაშაულის ხანდაზმულობის ვადებს არ ცნობს, საყვარელიძის სამაგალითო დასჯა დღის წესრიგიდან წლების შემდეგაც არ მოხსნილა. სულ რამდენიმე დღის წინ რუსულ პრესაში გამოქვეყნდა ინფორმაცია, რომ ბულგარეთში ყოფილ „კანონიერ ქურდ“ გიორგი საყვარელიძეზე ნადირობა გამოცხადდა. მოსალოდნელი საფრთხის შესახებ ის პირადად გააფრთხილეს, თუმცა დიდი ალბათობით საყვარელიძე მოწინააღმდეგეების განეიტრალებას ამჯერადაც მოახერხებს ახლა უკვე გავლენიანი ბულგარელი პოლიტიკოსების დახმარებით.
მის მთავარ ლობისტად სკანდალური ბულგარელი პოლიტიკოსი, სლავა ბინევი სახელდება. რუსული პრესა წერს, რომ მათ ახლო მეგობრობის გარდა შავი ბიზნესიც აკავშირებთ. ბინევი ევროპარლამენტის დეპუტატიც იყო პარტია „ატაკადან“. „ვიკილიკსის“ ცნობით, ის დაკავშირებულია ისეთ შავ ბიზნესებთან, როგორიცაა პროსტიტუცია, ნარკოტიკები და მოპარული ავტომობილების რეალიზაცია. ამბობენ, რომ ამ არალეგალურ ბიზნესებში საკუთარი ინტერესები აქვს გიორგი საყვარელიძესაც.
მას სასიკვდილო განაჩენი ჯერ კიდევ წლების წინათ გამოუტანეს და ამ გადაწყვეტილების მიღებაში მონაწილეობდნენ ისეთი გავლენიანი „კანონიერი ქურდები“, როგორებიც არიან შაქრო კალაშოვი და ტარიელ ონიანი. რუსულ პრესას თუ დავუჯერებთ, ამ განაჩენის აღსრულებამდე არცთუ ისე დიდი დრო დარჩა.
რევაზ გამცემლიძის მკვლელობაში კიდევ ერთი ეჭვმიტანილი გოგა ბზიკაძე ქურდულმა მართლმსაჯულებამ საიქიოში ჯერ კიდევ 1994 წელს გაისტუმრა. ის სწორედ „კანონიერი ქურდის“ რევაზ გამცემლიძის მკვლელობის გამო დაისაჯა. რა ბედი ეწევა მკვლელობის მთავარ ორგანიზატორს და უშველის თუ არა მას ბულგარეთის პოლიტიკურ ელიტასთან მეგობრობა, წესით, უახლოეს ხანში უნდა გაირკვეს. ამბობენ, რომ ბოლო რამდენიმე კვირის განმავლობაში გიორგი საყვარელიძე გაძლიერებული დაცვით გადაადგილდება.