რუსეთში ზიკას ცხელების იმპორტირებული შემთხვევა დაფიქსირდა. ვირუსი ქალს აღმოაჩნდა, რომელიც მოსკოვში ინდონეზიის კუნძულ ბალიზე დასვენების შემდეგ დაბრუნდა. ინფორმაციას რუსეთის მომხმარებელთა უფლებების დაცვისა და ადამიანის კეთილდღეობის ზედამხედველობის ფედერალური სამსახური ავრცელებს.
უწყების ცნობით, რუსეთში ინფექციის გავრცელების რისკი გამორიცხულია. მათივე განმარტებით, ქვეყანაში გავრცელებული კოღოები ტროპიკული ცხელებების გადამტანების სახით მაღალ ეპიდემიოლოგიურ საფრთხეს არ წარმოადგენენ.
მათივე ინფორმაციით, რუსმა მეცნიერებმა ზიკას ვირუსის სწრაფი დიაგნოსტიკისთვის სპეციალური ტესტ-სისტემები შეიმუშავეს, რომლებიც დაავადების სხვა ინფექციებისგან გასარჩევად გამოიყენება.
ცნობისთვის, ზიკას ვირუსი ინფექციური დაავადებაა, რომელიც ძირითადად ინფიცირებული Aedes-ის გვარის კოღოს კბენით გადადის. ეს კოღოები უმეტესად ტროპიკულ და სუბტროპიკულ რეგიონებში გვხვდება. ზიკას ვირუსის საწინააღმდეგო სპეციფიკური ანტივირუსული მკურნალობა და ფართოდ ხელმისაწვდომი ვაქცინა ამჟამად არ არსებობს. მკურნალობა სიმპტომების შემსუბუქებას გულისხმობს.