გზების გადაკეტვა საერთოდ არ იყო კანონიერი იმდენად, რამდენადაც ამას არ მოითხოვდა ადამიანების ის რაოდენობა, რომელიც იქ იყო – განაცხადა გადაცემა „დღის ქრონიკაში“ „ერთიანი ნეიტრალური საქართველოს“ ერთ-ერთმა დამფუძნებელმა ნანა კაკაბაძემ.
მისივე თქმით, როდესაც ხელოვნურად კეტავ გზას მხოლოდ და მხოლოდ იმის გამო, რომ გააღიზიანო საზოგადოება, განაწყო ხელისუფლების წინააღმდეგ, ეს არის არა აქცია და არა პროტესტის გამოხატვა, არამედ, შურისძიება საკუთარი მოსახლეობის, საკუთარი საზოგადოების წინააღმდეგ.
„ნებისმიერი რამის მოთხოვნასაც აქვს თავისი ასაკი, ალბათ სადღაც 5-7 წლამდე შესაძლოა იყოს დასაშვები და უკვე სრულ წლოვანებაში ყველანაირ მოთხოვნას უნდა ჰქონდეს თავისი საფუძველი. ამ შემთხვევაში, როდესაც პოლიტიკურ მოთხოვნებს აყენებ და გინდა, რომ ქუჩა გადაკეტო, ამას აქვს თავის სამართლებრივი საფუძვლები და არეგულირებს კანონი. ქუჩა იკეტება მხოლოდ და მხოლოდ ისეთ შემთხვევაში, როდესაც ადამიანების რაოდენობა ამას მოითხოვს. ანუ, ადამიანების რაოდენობა, რომელიც არ ეტევა, ვთქვათ, ტროტუარებზე და იძულებულები არიან გადავიდნენ მანქანის სავალ ნაწილზე და გადაკეტონ გზა, ასეთ შემთხვევაშია დასაშვები. სხვა შემთხვევაში ეს არის დაუშვებელი.
ასე, რომ მათ უნდათ და ისინი მოითხოვენ, არ ნიშნავს, რომ ეს არის აუცილებლად აღსასრულებელი. აღსასრულებელი არის კანონი, რომელიც ქვეყანაში არსებობს და ამ კანონს უნდა ემორჩილებოდეს ყველა – ხელისუფლება, ოპოზიცია, მედია, არასამთავრობო ორგანიზაციები. ინდულგენცია არ შეიძლება იყოს არც ოპოზიციონერობა, არც ხელისუფლებაში ყოფნა და არც, რა თქმა უნდა, მედიის ან „ენჯეოს“ წარმომადგენლობა. აქედან გამომდინარე, მათი მოთხოვნა არის თუ არა სამართლიანი და ემყარება თუ არა კანონს, ამაზე შეგვიძლია ვიმსჯელოთ.
ვფიქრობ, გზების გადაკეტვა საერთოდ არ იყო კანონიერი იმდენად, რამდენადაც ამას არ მოითხოვდა ადამიანების ის რაოდენობა, რომელიც იქ იყო. ანუ, საჭიროება არ მოითხოვდა გზების გადაკეტვას და ეს იყო ხელოვნურად. როდესაც ხელოვნურად კეტავ გზას მხოლოდ და მხოლოდ იმის გამო, რომ გააღიზიანო საზოგადოება, განაწყო ის წინააღმდეგ, ამ შემთხვევაში ალბათ ფიქრობენ ხელისუფლების წინააღმდეგ, ეს არის არა აქცია და არა პროტესტის გამოხატვა, არამედ, შურისძიება საკუთარი მოსახლეობის, საკუთარი საზოგადოების წინააღმდეგ“, – აღნიშნა ნანა კაკაბაძემ.