საზოგადოებრივი მაუწყებლის ამჟამინდელი მენეჯმენტი, რომელიც ახლა, გარკვეულწილად, დარტყმის ქვეშაა, არის მენეჯმენტი, რომელსაც ოთხი წლის განმავლობაში არცერთი პრემია, პრივილეგია, დანამატი არ აუღია, მაგრამ, საპირწონედ, ავაშენეთ საუკუნის შენობა, შევქმენით თავისუფალი სივრცე, დავამკვიდრეთ მაღალი სტანდარტი, – ამის შესახებ საზოგადოებრივი მაუწყებლის გენერალურმა დირექტორმა, თინათინ ბერძენიშვილმა სამეურვეო საბჭოს დღევანდელ სხდომაზე განაცხადა, სადაც საზოგადოებრივი მაუწყებლის მომავალი წლის ბიუჯეტი განიხილეს.
„რაც შეეხება ჩვენს სახელფასო პოლიტიკას, ის ოთხი წლის განმავლობაში იყო ერთი და ასეც დარჩება მომდევნო წლებში, ორი წლის მანდატში. სტატისტიკისთვის, ჩვენ ამ ოთხი წლის განმავლობაში 932 ადამიანზე გავაკეთეთ სახელფასო მატება. წლევანდელ ბიუჯეტში დაგეგმილია სახელფასო ზრდა 400 თანამშრომელზე, რომელიც მოიცავს 50 პროფესიას, ასევე დაგეგმილია 14 პოზიციაზე ვაკანსიის გამოცხადება“, – განაცხადა თინათინ ბერძენიშვილმა.
საზოგადოებრივი მაუწყებლის გენერალურმა დირექტორმა სამეურვეო საბჭოს მიმართა, მისი ხელფასის გაზრდის საკითხი მოიხსნას და ვადის ამოწურვამდე მოქმედი კონტრაქტის პირობები დარჩეს ძალაში.
„გენერალურ დირექტორს უნდა ჰქონდეს სტაბილური ანაზღაურება, რათა არ ჰქონდეს ცდუნება, სხვა ინტერესები ჩართოს საკმაოდ მაღალი ბიუჯეტის მართვის დროს. აბსოლუტურად ვეთანხმები თქვენს გადაწყვეტილებას, თუმცა დამიტოვეთ უფლება, მე დავრჩე იმ კონტრაქტის პირობებში, რომელიც გათვალისწინებული მაქვს 2020 წლიდან 2026 წლამდე და ყველა ჩემი დაპირება, რომელიც იყო და რომელსაც დავთანხმდი, იყოს უცვლელი. ეს არის ჩემი უფლება და გთხოვთ, დამიტოვოთ ეს უფლება, თუმცა 2026 წლიდან, ცხადია, მხარს ვუჭერ ნებისმიერ ცვლილებას“, – აღნიშნა თინათინ ბერძენიშვილმა.
როგორც თინათინ ბერძენიშვილმა აღნიშნა, მაუწყებლის ბიუჯეტი არის გამჭვირვალე და პასუხობს ყველა გამოწვევას.
„საზოგადოებრივი მაუწყებლის ბიუჯეტი არის გამჭვირვალე, დაცულია ყველა საკანონმდებლო ნორმა და პასუხობს ყველა იმ გამოწვევას, რომელიც გვაქვს არა მხოლოდ წელს, არამედ 2026 წლამდე, რადგან ჩემი მანდატი სწორედ ამ თარიღს უკავშირდება. ასევე, გათვალისწინებულია ახალ შენობაში გადასვლის ნაწილი, ახალი გადაცემები, რომლებიც ახალ სატელევიზიო ბადეში იქნება განთავსებული და თანამშრომლების სახელფასო სარგო, რომელსაც აქვს თავისი კრიტერიუმები, რის საფუძველზეც ყოველწლიურად იზრდება“, – განაცხადა თინათინ ბერძენიშვილმა.