სირიის ცენტრალურმა ბანკმა 2018-2019 წლებში ფარულად 250 მილიონამდე დოლარი ნაღდი ფულის სახით თვითმფრინავებით მოსკოვში გადაიტანა. სტატიას ამ შინაარსით The Financial Times-ი ავრცელებს.
გამოცემის მტკიცებით, ფულის სირიაში გადაზიდა იმ დროს მოხდა, როცა სირია რუსეთის მხარდაჭერაზე ძალიან იყო დამოკიდებული, ხოლო თავად ბაშარ ასადი დასავლური სანქციების ქვეშ იყო.
ამის პარალელურად, ასადის ოჯახი ფიქციური კომპანიების მეშვეობით მოსკოვში უძრავ ქონებას ყიდულობდა. ფულს სირიიდან რუსულ ბანკებში რიცხავდნენ, რომლებიც შემდეგ ამერიკული სანქციების ქვეშ აღმოჩნდნენ.
როგორც აშშ-ის სახელმწიფო მდივნის ყოფილმა თანაშემწემ ახლო აღმოსავლეთის საკითხებში დევიდ შენკერმა The Financial Times-ს განუცხადა, სავარაუდოდ, ასადის რეჟიმი ქვეყნიდან ყაჩაღობით მოპოვებული ფულის რუსეთში გატანით იყო დაკავებული, რათა შემდეგ რუსეთის დედაქალაქში მას და მის გარემოცვას კარგად ეცხოვრა.
თუმცა, როგორც გამოცემას ერთ-ერთი წყარო უყვება, სირიის ცენტრალური ბანკი ასე იქცეოდა იმიტომ, რომ სანქციების გამო მას რუსეთში ფულის გადარიცხვა არ შეეძლო. სირია რუსეთისგან ხორბალს და იარაღს ყიდულობდა და მას ამ მომსახურების საფასური უნდა დაეფარა.