რაც მათ ამ დღეებში გააკეთეს, ვნახეთ, რომ ევროსაბჭოს გენერალურ მდივანს ლამის, კრემლთან კავშირი დააბრალეს, – განაცხადა საქართველოს პარლამენტის თავმჯდომარემ შალვა პაპუაშვილმა ევროსაბჭოს გენერალური მდივნის საქართველოში ვიზიტსა და მის მიერ გაკეთებულ განცხადებებზე ოპოზიციის რეაქციის შეფასებისას.
„ევროსაბჭოს გენერალური მდივნის სტუმრობა ძალიან კარგი მაგალითია და რეაქცია, რომელიც შემდგომ ვნახეთ. მათ შორის, მან გუშინ შემაჯამებელი „ტვიტი“ დაწერა და უნდა ნახოთ ის სიძულვილისა და მუქარის კორიანტელი, რომელიც „ტვიტერზე“ კომენტარებშია. პირდაპირ წარმოაჩინა სახე ქართულმა ოპოზიციამ „ენჯეო“ სექტორმა ევროსაბჭოს მიმართ და შეიძლება, ითქვას, რომ ევროპის დონეზე შეგვარცხვინეს, მაგრამ კარგი მაგალითი არის ზუსტად ეს, როგორ ყალიბდება ხოლმე აღქმები. რაც მათ ამ დღეებში გააკეთეს, ვნახეთ, რომ ევროსაბჭოს გენერალურ მდივანს ლამის, კრემლთან კავშირი დააბრალეს და თავისი მომხრეების ნაწილში ალბათ, ზუსტად ეს აღქმა შექმნეს. ის სიძულვილი, რომელიც მის „ტვიტებს“ მოჰყვა, ამის მანიშნებელია. ეს აისახება ხოლმე შემდეგ მათ შორის, თავად ეუთო/ოდირის დასკვნებში“, – განაცხადა შალვა პაპუაშვილმა.
მან ასევე, წაიკითხა ამონარიდი ეუთო/ოდირის დასკვნიდან.
„ერთ პასაჟს წაგიკითხავთ ეუთო/ოდირის დასკვნიდან, რომელიც საქართველოს ეხება და რომელსაც ცდილობენ, რომ სათავისოდ მოირგონ:
„კამპანიის განმავლობაში კვლავ ფართოდ იყო გავრცელებული ცნობები ამომრჩევლებზე, განსაკუთრებით საჯარო სექტორში დასაქმებულებზე განხორციელებული წნეხის შესახებ. ამ ცნობებთან ერთად არჩევნების დღეს ამომრჩევლის აღრიცხვამ გააჩინა წუხილი, თუ რამდენად შეძლებდა ზოგიერთი ამომრჩეველი შიშის გარეშე არჩევანის გაკეთებას“.
ეს აბზაცი არის აწყობილი იმ აღქმებზე, რომელიც იქმნებოდა ცნობების გამო. ამაზე ვსაუბრობდი მე, რომ იქმნებოდა საინფორმაციო ხმაური, რომელიც შემდეგ აისახება სხვადასხვა ანგარიშში თუ სხვადასხვა ჯგუფის აღქმებში, რომ თითქოს, იყო დაშინება ან ზეწოლა. კარგია, რომ ეუთო/ოდირი ზუსტად ამას უსვამს ხაზს, რომ იყო ცნობები ზეწოლასთან დაკავშირებით და თავად ეუთო/ოდირი არც ერთ ადგილზე არ ამტკიცებს, რომ ასეთი ფაქტები არსებობდა“, – განაცხადა პარლამენტის თავმჯდომარემ.
მისი შეფასებით, ევროსაბჭოს გენერალური მდივნის სტუმრობა ზუსტად აჩვენებს, ცარიელ ადგილზე როგორ ქმნის ოპოზიცია ყალბ ნარატივებს.
„ამ მნიშვნელოვანი ორგანიზაციის ხელმძღვანელი, იმის გამო, რომ რაღაც არ მოეწონათ მის რომელიღაც წინადადებაში, პირდაპირ გამოაცხადეს ლამის რუსეთის აგენტად. მათ შორის, „ნაციონალურმა მოძრაობამ“ მიმართა ევროსაბჭოს იმისთვის, რომ განიხილოს ამ ადამიანის საკითხი. ასეთ აბსურდთან გვაქვს საქმე, როდესაც ნებისმიერი ადამიანი, რომელიც მათ ნარატივში არ ჯდება, ხდება მისი სტიგმატიზება, როგორც რუსეთის აგენტისა, და მორჩა, მის მიმართ ყველაფერი შეიძლება. ეს არის ზუსტად ის ბოლშევიზმი, ლიბერალური ფაშიზმი, რომელიც დღეს მათ შორის, გარედან წაქეზებით საქართველოში არის“, – განაცხადა შალვა პაპუაშვილმა.