”მათ აქვთ სურვილი, იმდენად დააზიანონ ქვეყანა, რომ საერთოდ სახელმწიფოებრიობა დაშალონ. მაქსიმალურად ცდილობენ, სურათი შექმნან, რომ ამ ქვეყანას არ ჰყავს ხელისუფლება”, – ამის შესახებ საგარეო საქმეთა მინისტრმა, მაკა ბოჭორიშვილმა გადაცემაში „იმედი LIVE“, ოპოზიციაზე საუბრისას განაცხადა.
მინისტრის თქმით, იყო მცდელობა, საზოგადოება დაეჯერებინათ, რომ ხელისუფლების წარმომადგენლებს არავინ არ ხვდება.
„ეს სცენარიც არ გამოუვიდათ. ჩვენ გვქონდა შეხვედრები არჩევნების შემდეგ და ნახეთ, რა ისტერია მოჰყვა ყველა ჩემს შეხვედრას – თბილისში იქნებოდა, თუ – საზღვარგარეთ, კოლეგებთან, დიპლომატებთან. განსაკუთრებული აგრესიით გამოირჩეოდნენ სწორედ ამ ადამიანების მიმართ, რატომ ხვდებით, რატომ ართმევთ ხელს! ის სურათი დაირღვა, რაც მათ უნდოდათ წარმოეჩინათ ქართული საზოგადოებისთვის, თითქოს სრული იზოლაციაა. „ქართულ ოცნებას“ არავინ არ ესაუბრება და არავინ არ დაელაპარაკება. საბედნიეროდ და მათთვის სამწუხაროდ, ეს ასე არ არის და არც იქნება. ყოველთვის საჭიროა ხელისუფლების წარმომადგენლებთან საუბარი, რაც არავის არ უშლის ხელს მათთან ურთიერთობას, თუმცა მათ აქვთ ეს სურვილი, რომ იმდენად დააზიანონ ეს ქვეყანა, რომ საერთოდ სახელმწიფოებრიობა დაშალონ. მაქსიმალურად ცდილობენ, რომ ასეთი სურათი შექმნან, რომ ამ ქვეყანას არ ჰყავს ხელისუფლება და არ უნდა ელაპარაკოთ ხელისუფლებას“, – განაცხადა ბოჭორიშვილმა.