აშშ-ში Azerbaijan Airlines-ის კუთვნილი სამგზავრო თვითმფრინავის ჩამოვარდნაში რუსეთის სამხედრო-საჰაერო ძალების დარტყმის კვალს არ გამორიცხავენ და აღნიშნავენ, რომ ამაზე „გარკვეული ადრეული მინიშნებები“ მიუთითებენ, – იუწყება BBC.
შეერთებული შტატების ნაციონალური უსაფრთხოების საბჭოს სტრატეგიული კომუნიკაციების კოორდინატორმა, ჯონ კირბიმ განაცხადა, რომ აშშ-ს აქვს შესაბამისი სადაზვერვო ინფორმაცია.
კირბიმ საკითხის დეტალურად განხილვისგან თავი შეიკავა და აღნიშნა, რომ გამოძიება გრძელდება. კითხვაზე, აქვს თუ არა ამერიკის მთავრობას სადაზვერვო ინფორმაცია, თუ ისინი ექსპერტების მოსაზრებებს ეყრდნობიან, კირბიმ მოკლედ უპასუხა: „კი“.
Azerbaijan Airlines-ის კუთვნილი სამგზავრო თვითმფრინავი, ყაზახეთის ქალაქ აქტაუსთან 25 დეკემბერს ჩამოვარდა. ის ბაქოდან გროზნოში მიფრინავდა. კატასტროფისას თვითმფრინავის ბორტზე 67 ადამიანი იმყოფებოდა. მათგან 38 დაიღუპა.
თავდაპირველად საუბარი იყო იმაზე, რომ თვითმფრინავს ფრინველები შეეჯახნენ, რამაც ავიაკატასტროფა გამოიწვია, თუმცა შემდეგ უცხოურ მედიაში გავრცელდა ინფორმაცია აზერბაიჯანის ხელისუფლებაზე დაყრდნობით, რომ თვითმფრინავი რუსების მიერ ნასროლმა „ხმელეთი-ჰაერის“ ტიპის რაკეტამ დააზიანა, რამაც მისი ჩამოვარდნა განაპირობა.