უკრაინა 2025 წელს სუსტ მდგომარეობაში ხვდება, ფრონტზე რთული ვითარებაა და უკრაინის სასარგებლოდ სიტუაციის შეცვლის საფუძველი არ არსებობს, – წერს გერმანული გამოცემა Die Welt-ი.
სტატიაში აღნიშნულია, რომ დონეცკის ოლქში, ფრონტის ყველაზე ცხელ მიმართულებაზე, უკრაინა რამდენიმე საკვანძო ქალაქის დაკარგვასთან ახლოსაა.
„რუსებმა თავიანთი შეტევის კულმინაციას მიაღწიეს“, – ამბობს სამხედრო ექსპერტი, მარკუს რაიზნერი.
კერძოდ, ის აღნიშნავს, რომ რუსები პოკროვსკის მახლობლად უკრაინის თავდაცვის მესამე ხაზს მიუახლოვდნენ.
რაიზნერი მოელის, რომ უკრაინული ჯარები კურახოვოს რაიონიდან უახლოეს კვირებში გავლენ. ის ასევე ხედავს რუსების მიერ ქალაქ ჩასივ-იარის სრულად აღების საფრთხეს.
რაიზნერი უკრაინის ოპერაციას კურსკის ოლქში მთლიანობაში წარუმატებლად მიიჩნევს.
„უკეთესი იქნებოდა ეს უკრაინული რეზერვები სხვაგან განეთავსებინათ“, – ამბობს ანალიტიკოსი.
მან აღნიშნა, რომ რუსეთმა კურსკის ოლქში დაკარგული ტერიტორიების დაახლოებით ნახევარზე კონტროლი უკვე დაიბრუნა, ხოლო ექსპერტების პროგნოზით, 2025 წლის გაზაფხულისთვის უკრაინამ შესაძლოა სრულად დაკარგოს კურსკის ოლქში დაკავებული ტერიტორია.
უკრაინის ერთ-ერთ ყველაზე დიდ პრობლემად რჩება პერსონალის ეგზისტენციალური უკმარისობა. ზოგჯერ ფრონტის საკვანძო სექტორებში ყოველ უკრაინელ ჯარისკაცზე შვიდამდე რუსი ჯარისკაცი მოდის. ეს ნაწილობრივ უკრაინაში მობილიზაციის პრობლემების შედეგია.
ამასთან, დასავლელი პარტნიორები არ ავლენენ განზრახვას, მიაწოდონ უკრაინას საკმარისი იარაღი, რათა შეცვალოს ომის მიმდინარეობა.
მარკუს რაიზნერი მიიჩნევს, რომ კიევისთვის შესაძლო სამშვიდობო მოლაპარაკებების მთავარი თემა უნდა იყოს დასავლეთის უსაფრთხოების გარანტიები, რომლებიც დაიცავს უკრაინას რუსეთის ახალი თავდასხმისგან, თუმცა, ცალკეული ევროპული სახელმწიფოების სამხედრო გარანტიები, სავარაუდოდ, არ იქნება საკმარისი კრემლის ხელახალი შეჭრისგან დაცვისთვის.