უკრაინის პრეზიდენტმა ვოლოდიმირ ზელენსკიმ ამერიკელ ჟურნალისტ ლექს ფრიდმანთან ინტერვიუში განაცხადა, რომ ის მის ქვეყანაში ცეცხლის შეწყვეტის შესახებ სამშვიდობო მოლაპარაკებებს ჯერ აშშ-ის არჩეულ პრეზიდენტთან დონალდ ტრამპთან გამართავს, ხოლო შემდეგ სასაუბროდ რუსეთის პრეზიდენტთან ვლადიმერ პუტინთან დაჯდება.
ინტერვიუს დროს ფრიდმანმა აღნიშნა, რომ ოცნებობს, როცა 25 იანვარს ზელენსკი, ტრამპი და პუტინი მოლაპარაკებების მაგიდას მიუსხდებიან და ცეცხლის შეწყვეტისა და უსაფრთხოების ძლიერი გარანტიების შესახებ მოილაპარაკებენ და შემდეგ ხელს მოაწერენ.
„ვფიქრობ, 25 იანვარს, ან სხვა დღეს ჩვენ პირველ რიგში დავსხდებით ტრამპთან. ჩვენ მასთან უნდა მოვილაპარაკოთ, თუ როგორ ვაჩერებთ ომს და პუტინს. მეორე – ჩვენთვის ძალიან მნიშვნელოვანია, რომ ევროპასაც ჰქონდეს ხმა, იმიტომ რომ ჩვენ ევროპის ნაწილი ვართ არა მხოლოდ გეოგრაფიულად, არამედ გეოპოლიტიკურად“, – თქვა ზელენსკიმ.
მხოლოდ ტრამპთან საუბრის შემდეგ შესაძლებელი იქნება უკვე პუტინთან მოლაპარაკებების გამართვა, დასძინა ზელენსკიმ.