დიდი ბრიტანეთის პრემიერ-მინისტრმა, კირ სტარმერმა Sky News-თან ინტერვიუში განაცხადა, რომ რუსეთთან ომი არა მხოლოდ უკრაინის სუვერენიტეტთანაა დაკავშირებული, არამედ დიდ ბრიტანეთზე გავლენასთან.
სტარმერი კიევში 16 იანვარს ჩავიდა. მხარეებმა ხელი მოაწერეს შეთანხმებას, რომელიც თავდაცვითი ურთიერთობების გაღრმავებისა და ეკონომიკური კავშირების გაძლიერებას არასამხედრო სფეროებში ეხება.
სტარმერის თქმით, მისი ვიზიტი ემსახურებოდა შემდგომი ქმედებების განხილვას უკრაინასთან მიმართებაში.
„მე არ მინდა მოვლენებს წინ გავუსწრო, მაგრამ მე მათ გავაგებინე, რომ ჩვენ სრულყოფილ როლს ვითამაშებთ იმიტომ, რომ საქმე მხოლოდ უკრაინის სუვერენიტეტს არ ეხება. საქმე იმასაც ეხება, რა გავლენას მოახდენს ეს დიდ ბრიტანეთზე და მის ღირებულებებზე, ჩვენს თავისუფლებასა და დემოკრატიაზე. იმიტომ, რომ თუ რუსეთი ამ აგრესიაში წარმატებული იქნება, ეს ჩვენზე ყველაზე ძალიან, ძალიან დიდი ხნის განმავლობაში იქონიებს ზეგავლენას“, – განაცხადა სტარმერმა.
სტარმერის ვიზიტი უკრაინაში მას შემდეგ შედგა, რაც კირ სტარმერმა უკრაინაში შექმნილი ვითარება საფრანგეთის პრეზიდენტ ემანუელ მაკრონთან განიხილა, რომელმაც დასავლელი ლიდერებიდან პირველმა განაცხადა უკრაინაში მოკავშირეების კონტინგენტის გაგზავნის შესაძლებლობის შესახებ.