„საზოგადოებას ყოველთვის ვახსენებთ ჩვენს, „ხალხის ძალის“ წერილებს, სადაც აღწერილი იყო, თუ როგორ განვითარდებოდა პოლიტიკური მოვლენები, ვინ იქნებოდა ავტორი ე.წ. რევოლუციის თუ ე.წ. ლგბტ პროპაგანდის, სად იყო ეს უცხოური ძალა და ა.შ. ეს ყველაფერი დღეს ერთი-ერთში სრულდება“, – ამის შესახებ მედიასთან „ხალხის ძალის“ აღმასრულებელმა მდივანმა, დეპუტატმა გურამ მაჭარაშვილმა განაცხადა.
მისი თქმით, აშშ-ში ადმინისტრაციის ცვლილების შემდეგ, ახალი ეპოქა იწყება მსოფლიოში და ამ დღის წესრიგში საქართველო, როგორც სუვერენული და ღირსეული ქვეყანა, ისე ჩაჯდება.
„ხალხის ძალა“, ასევე, ვამბობდით, რომ არ ვიყავით არც ამერიკის და არც ევროპის წინააღმდეგნი, არამედ, ვიყავით იმ ადმინისტრაციისა და თანამდებობის პირების წინააღმდეგნი, რომლებიც უსამართლო და აბსოლუტურად შეურაცხმყოფელ განცხადებებს აკეთებდნენ საქართველოს მიმართ.
აღმოჩნდა, რომ აშშ-ის მაშინდელი ადმინისტრაციის წინააღმდეგნი არა მხოლოდ ქართული საზოგადოება ვიყავით, არამედ, თავად ამერიკული საზოგადოებაც, რადგან მათ ბაიდენის ადმინისტრაცია სწორედ იმ პოლიტიკის გამო გაუშვეს სახლში, რაც [არ მოგვწონდა და რაც] აშშ-ის ახლადარჩეულმა პრეზიდენტმა დონალდ ტრამპმა უკვე რადიკალურად შეცვალა. შესაბამისად, ევროკავშირის ქვეყნებმაც გაბედეს და ხმა ამოიღეს. რაც მთავარია, ევროპულმა საზოგადოებამ გაიღვიძა და ეს ვნახეთ იმ ბევრი ევროპარლამენტარის გამოსვლაში, რომელთაც საქართველოს სასარგებლოდ გააკეთეს განცხადებები. დღეს თავისუფლად შეგვიძლია ვთქვათ, რომ აბსოლუტურად ახალი ეპოქა იწყება მსოფლიოში და დარწმუნებული ვარ, რომ ამ დღის წესრიგში საქართველო, როგორც სუვერენული და ღირსეული ქვეყანა, ისე ჩაჯდება“, – აღნიშნა გურამ მაჭარაშვილმა.