“სრულიად სამართლიანად ვეძახით მათ უსამშობლოებს”

სრულიად სამართლიანად ვეძახით მათ უსამშობლოებს, ვინაიდან ისინი პოლიტიკური გუნდის ოპოზიციაში კი არ არიან, ისინი თავისი ქვეყნის, თავისი მოსახლეობის ოპოზიციაში არიან, – განუცხადა ჟურნალისტებს საპარლამენტო ფრაქცია „ქართული ოცნების“ თავმჯდომარის პირველმა მოადგილემ, ირაკლი კირცხალიამ რადიკალურ ოპოზიციასთან დაკავშირებით.

მისი თქმით, როდესაც საუბარი იყო ვიზალიბერალიზაციაზე, ასოცირების ხელშეკრულებაზე, მათი წარმომადგენლები კაბინეტ კაბინეტ დარბოდნენ, რათა საქართველოსთვის პრივილეგიები არ მიენიჭებინათ.

„ამას ჩვენ დავარქვით და სრულიად სამართლიანად ბოროტი კუდის მოქნევა იმ ძალებისა, იმ ვითომ უხილავი ხელისა, რომელიც ძალიან თავხედურად ხილული გახდა განსაკუთრებით ბოლო თვეების განმავლობაში. არანაირი საფუძველი ასეთი დესტრუქციული ქმედების არ არსებობს. დღეს თუ ხვალ აუცილებლად მოვა დრო და გასაცემი იქნება ერთ კითხვაზე პასუხი, როგორ ხდება და რატომ იმსახურებს საქართველო თუნდაც განცხადების დონეზე, ასეთ არასამართლიან განცხადებას, როდესაც თვითონვე, მათივე ავტორიტეტული ინსტიტუტები ბოლო წლების და ბოლო თვეების განმავლობაში, ანგარიშში და კვლევა არ არსებობს სადაც არა მხოლოდ რეგიონში, არამედ ბევრ პოზიციაზე მსოფლიოში მოწინავე ადგილზეა.

რაც შეეხება ოპოზიციის წერილს და მერე მათ მიბრძანებას, ასე ვთქვათ, ამ ინსტიტუციაში, ესეც არ ახალია ჩვენთვის. ვიზალიბერალიზაციაზე რომ იყო, ასოცირების ხელშეკრულებაზე რომ იყო საუბარი, მათი წარმომადგენლები იყვნენ კაბინეტ კაბინეტ რომ დარბოდნენ, ოღონდ საქართველოს არ მიანიჭოთ ეს პრივილეგიები. ამიტომ, სრულიად სამართლიანად ვეძახით მათ უსამშობლოებს, ვინაიდან ისინი პოლიტიკური გუნდის ოპოზიციაში კი არ არიან, ისინი თავისი ქვეყნის, თავისი მოსახლეობის ოპოზიციაში არიან“, – აღნიშნა ირაკლი კირცხალიამ.

სტრასბურგში დღეს ევროსაბჭოს საპარლამენტო ასამბლეის ზამთრის სესია იხსნება. საქართველოს დელეგაცია, თეა წულუკიანის ხელმძღვანელობით, 29 იანვრის ჩათვლით, არაერთ შეხვედრას გამართავს.

ევროპის საბჭოს საპარლამენტო ასამბლეის პრეზიდენტსა და საპარლამენტო ფრაქციებს სამმა ოპოზიციურმა პარტიამ – „კოალიცია ცვლილებებისთვის“, „ერთიანობა ნაციონალური მოძრაობა“ და „ძლიერი საქართველო“ მიმართა წერილით, რომ საპარლამენტო ასამბლეაში საქართველოს საპარლამენტო დელეგაციის უფლებამოსილება არ დადასტურდეს.