გამოძიებამ სამხრეთ კორეაში ჩამოვარდნილი თვითმფრინავის ორივე ძრავში ფრინველების ბუმბული და სისხლი იპოვა. ექსპერტებმა უკვე ფრინველების სახეობაც დაადგინეს, რომლებთან შეჯახების გამო, 179 ადამიანი დაიღუპა. ინფორმაციას bild-ი ავრცელებს.
საჰაერო და სარკინიგზო ავარიების გამოძიების საბჭოს (ARAIB) ექვსგვერდიანი დოკუმენტის მიხედვით, თვითმფრინავის ორივე ძრავდი ფრინველებთან შეჯახების აშკარა ნიშნები აღმოაჩინეს. ბიოლოგიური რესურსების ეროვნული ინსტიტუტის (NIBR) დნმ-ის ანალიზმა აჩვენა, რომ ისინი მამრი იხვები იყვნენ.
აღსანიშნავია, რომ გადამფრენი ფრინველი ძირითადად ციმბირში ბინადრობენ, მაგრამ სამხრეთ კორეის ნახევარკუნძულზე იზამთრებენ. ფრინველების სიმაღლე 80-დან 95 სანტიმეტრამდეა და წონა 2,8-დან 3,5 კილოგრამამდე აღწევს.
თვითმფრინავი Boeing BA.N 737-800, ბანგკოკიდან მუანის პროვინციაში მიფრინავდა. აეროპორტში დაშვების დროს შასი არ გაიხსნა და პილოტებმა თვითმფრინავი მუცელზე დასვეს, რის შემდეგაც ის საფრენ ბილიკს გასცდა, კედელს შეეჯახა და აფეთქდა.
ავიაკატასტროფის შედეგად 179 ადამიანი დაიღუპა და მხოლოდ 2 გადარჩა, ისინი ეკიპაჟის წევრები არიან.
სამხრეთ კორეის ხელისუფლების ცნობით, საბედისწერო ავარიამდე ოთხი წუთით ადრე, ერთ-ერთმა პილოტმა ჩიტების გუნდთან შეჯახების შესახებ განაცხადა და საგანგებო მდგომარეობა გამოაცხადა.
აღნიშნული ავიაკატასტროფა სამხრეთ კორეის ისტორიაში ყველაზე მასშტაბურად არის აღიარებული. შემთხვევა გასულ თვეში მოხდა.