ლევან დავითაშვილმა „დღის ქრონიკაში“, საქართველოში დაგეგმილ მსხვილ პროექტებზე ისაუბრა და განმარტა, როგორი იქნება ინვესტიციის ეკონომიკური ეფექტი.
ვიცე-პრემიერის თქმით, ექვსი მილიარდი დოლარის უცხოური ინვესტიციის საქართველოში განხორციელების გადაწყვეტილება ადასტურებს, რომ ქვეყანა საინვესტიციო რუკაზე კიდევ უფრო მიმზიდველი ადგილი ხდება
„ეს არის დემონსტრირება იმის, რომ საქართველოში მართლაც არის ხელსაყრელი საინვესტიციო კლიმატი და აქედან გამომდინარე იყო მიღებული ეს გადაწყვეტილება – საქართველოში მრავალმილიარდიანი საინვესტიციოპროექტის განხორციელების. ასევე აღსანიშნავია, რომ ჩვენთვის პრიორიტეტი ყოველთვის არის ხარისხიანი უცხოური პირდაპირი ინვესტიციები, თუმცა ზოგადად კაპიტალის შემოდინება მისასალმებელია, მაგრამ მას თავისი სხვადასხვა შედეგი გააჩნია იმის მიხედვით, თუ როგორი შინაარსისა ინვესტიციები და ვინ არის ინვესტორი. ამ შემთხვევაში საუბარია ერთ-ერთ ყველაზე უფრო წარმატებულ დეველოპერულ ჯგუფზე, რომელიც არა მხოლოდ რეგიონის ლიდერია, არამედ მსოფლიოში გამორჩევა ღირსშესანიშნავი პროექტებით და რა თქმა უნდა საქართველოში განხორციელებული ინვესტიციები იქნება მნიშვნელოვანი ჩვენი ეკონომიკისთვის, მაგრამ ასევე მნიშვნელოვანი იქნება ზოგადად ჩვენი ქვეყნის ცნობადობის ასამაღლებლად. ეს იქნება ბიძგის მიმცემი სხვა ბევრი საერთაშორისო სადეველოპეროკომპანიისთვის, რომ საქართველო განიხილონ როგორც საინტერესო ბაზარი. ვფიქრობ, საქართველოში უძრავი ქონების ბაზარი ამ ინვესტიციის განხორციელების შედეგად უნდა შეიცვალოს, თვისობრივად გაუმჯობესდეს, ხარისხობრივად სხვა დონეზე გადავიდეს, ამიტომ ჩვენ მივესალმებით ამ ინვესტიციას.
ჩვენ ამ პროექტის დაწყებას უახლოეს ხანებში ვგეგმავთ. ამ მიმართულებით წინასწარი სამუშაოები უკვე განხორციელებულია. ჩვენ წინასწარი შესწავლები ჩატარებული გვაქვს, გარკვეული ტერიტორიები გამოკვლეულია, ჩატარებულია კვლევები, რომელიც საფუძველი იყო იმის, რომ საბოლოო საინვესტიციო გადაწყვეტილება დადებითი ყოფილიყო. ძალიან მნიშვნელოვანია ის პოლიტიკური მხარდაჭერა და გადაწყვეტილება, რომელიც არაბთა გაერთიანებულ საამიროებს აქვს.
ძირითადი დრო დაეთმობა დეტალურ პროექტირებას და სამშენებლო ეტაპზე გადავალთ მომავალი წლიდან. მნიშვნელოვანი ინვესტიციების განხორციელება უკვე კონკრეტული თანხების დახარჯვა მასშტაბურად დაიწყება 2026 წლიდან“, – აღნიშნა ლევან დავითაშვილმა.
მისი თქმით, ამ პროექტების განხორციელებამ შეიძლება თბილისისა და ბათუმის ეკონომიკის დაახლოებით 2%-იანი ზრდა გამოიწვიოს.
საქართველოს ისტორიაში უმსხვილესი ინვესტიცია – დეველოპერული კომპანია Emaar Properties/Eagle Hills-ისაქართველოში 6 მილიარდი აშშ დოლარის მოცულობის ინვესტიციას განახორციელებს, – თანამშრომლობის მემორანდუმი კომპანიასა და ქართულ მხარეს შორის აბუ-დაბიში საქართველოს პრემიერ-მინისტრ ირაკლი კობახიძის ვიზიტის ფარგლებში გაფორმდა.