ფედერალური დაფინანსების შეჩერების შესახებ აშშ-ის პრეზიდენტის, დონალდ ტრამპის გადაწყვეტილებას დემოკრატები ეწინააღმდეგებიან.
დემოკრატები ამტკიცებენ, რომ ეს გადაწყვეტილება უკანონო და სახიფათოა.
სენატში დემოკრატების ლიდერმა, ჩაკ შუმერმა განაცხადა, რომ ადმინისტრაციას არ აქვს უფლება, შეაჩეროს კონგრესის მიერ დამტკიცებული ხარჯები და ეს გადაწყვეტილება მილიონობით ამერიკელს დააზარალებს.
აშშ-ის კონსტიტუციით, ხარჯვის საკითხებს კონგრესი აკონტროლებს, თუმცა საარჩევნო კამპანიისას ტრამპმა განაცხადა, რომ პრეზიდენტს აქვს უფლება, შეაჩეროს დაფინანსება, თუ ის არ ეთანხმება მას.
ცნობისთვის, მართვისა და ბიუჯეტის ოფისის მოქმედმა ხელმძღვანელმა განაცხადა, რომ დაფინანსება შეჩერდება, ვიდრე ტრამპის ადმინისტრაცია არ გადახედავს ყველა გრანტსა და სესხს და დაადგენს, შეესაბამებიან თუ არა ისინი პრეზიდენტის პრიორიტეტებს. დაფინანსების შეჩერება ასევე ეხება საგარეო დახმარებებსა და არასამთავრობო ორგანიზაციებისთვის განკუთვნილ თანხებს. სააგენტოებს 10 თებერვლამდე აქვთ ვადა, წარადგინონ დეტალური ინფორმაცია იმ პროგრამების შესახებ, რომლებსაც ეს შეჩერება ეხება.