ლიეტუვას მიგრაციის დეპარტამენტის ხელმძღვანელის თქმით, მიგრაციის საკითხში უპირატესობა ფილიპინელებს ენიჭებათ, ხოლო ინდოეთიდან და ბანგლადეშიდან ბინადრობის ნებართვის მსურველთა სულ უფრო მზარდი რაოდენობა ჩამოდის.
2025 წლის 1 იანვრის მდგომარეობით, ლიეტუვაში ბინადრობის ნებართვის მქონე ფილიპინების 774 მოქალაქე ცხოვრობდა, ერთი წლით ადრე მათი რაოდენობა 487-ს შეადგენდა, ხოლო 2023 წელს – მხოლოდ 244-ს.
ლიეტუვას მიგრაციის დეპარტამენტის დირექტორი, ეველინა გუძინსკაიტე ამბობს, რომ ფილიპინებიდან მიგრანტების რაოდენობის პერმანენტული ზრდა ლიეტუვას დემოგრაფიულ პოლიტიკასთან არის დაკავშირებული.
„წინა მოწვევის პარლამენტმა მიიღო რეზოლუცია ლიეტუვას დემოგრაფიული და საიმიგრაციო პოლიტიკის შესახებ, რომელიც მიგრაციული ნაკადების დივერსიფიცირებას ითვალისწინებს. დოკუმენტის თანახმად, ჩვენი მიზანი უნდა იყოს მეტი უცხოელის მოზიდვა ლიეტუვასთან კულტურულად უფრო ახლოს მყოფი ქვეყნებიდან. ერთ-ერთი ასეთი ქვეყანა კი ფილიპინებია, სადაც მრავალი ქრისტიანი ცხოვრობს“, – განუცხადა მან სააგენტო „ბიზნეს ნიუს სერვისს“ (BNS).
გარდა ამისა, გუძინსკაიტეს თქმით, ფილიპინებიდან შემოდინებული შრომითი რესურსი მიგრაციულ სტანდარტებს ყველაზე მეტად აკმაყოფილებს.
„არსებობს მკაფიო და მკაცრი წესები ფილიპინებიდან შრომითი რესურსების მოსაზიდად, რაც უზრუნველყოფს იმას, რომ ეს მუშახელი საკმაოდ კვალიფიციურია და დამსაქმებელს არ ატყუებს, როგორც ეს სხვა ქვეყნებიდან შემოსულთა შემთხვევაში ხდება“, – აღნიშნა მან.
„ვფიქრობ, ფილიპინელი მიგრანტების რაოდენობის მაჩვენებელი წელს კიდევ უფრო მაღალი იქნება. სწორედ ფილიპინელებმა უნდა შეცვალონ ინდოეთის, პაკისტანის და ბანგლადეშის მოქალაქეები“, – აცხადებს გუძინსკაიტე.
2025 წლის იანვრის დასაწყისში, ლიეტუვაში ბინადრობის ნებართვის მქონე დაახლოებით 2 100 პაკისტანელი, 7 200 ინდოელი და დაახლოებით ათასი ბანგლადეშელი ცხოვრობდა.
მათი უმეტესობა ლიეტუვაში სამუშაოდ ან სასწავლებლად ჩავიდა. ეს ორივე ჯგუფი (მუშები და სტუდენტები) პაკისტანელებსა და ბანგლადეშელებში დაახლოებით ერთნაირი რაოდენობით არის წარმოდგენილი.
„ვფიქრობ, რომ მომავალში სტუდენტების რაოდენობა გაიზრდება, ხოლო იმ ადამიანების რიცხვი, რომლებიც სამუშაოდ ჩამოდიან, იგივე დარჩება ან შემცირდება“, -ვარაუდობს მიგრაციის დეპარტამენტის დირექტორი.
ინდოელი მიგრანტების შემთხვევაში, თითქმის 5000 მათგანი ლიეტუვაში დასაქმების მიზნით არის ჩამოსული, დაახლოებით 1600 სტუდენტია, 350 კი – კვალიფიციური სპეციალისტი. კიდევ რამდენიმე ასეული პირი ზემოთ დასახელებულ კატეგორიებში შემავალი ადამიანების ოჯახის წევრია.
ლიეტუვაში ბინადრობის ნებართვის მქონე პირებს შორის მაღალკვალიფიციური მუშაკის სტატუსი, საერთო ჯამში, 5800 უცხოელს აქვს.
მიგრაციის დეპარტამენტის მონაცემებით, უკრაინიდან, ბელარუსიდან და რუსეთიდან ლიეტუვაში ჩასული მიგრანტები კვლავ ყველაზე მრავალრიცხოვანი უცხოელი მაცხოვრებლები არიან, თუმცა, ბოლო ერთი წლის განმავლობაში, მათი რიცხვი შემცირდა.
„ისინი, რიცხოვნების მხრივ, კვლავ წამყვან ქვეყნებად რჩებიან, მაგრამ მათი მოქალაქეების რაოდენობა გასული წლის განმავლობაში შემცირდა. ყველაზე მეტად – ბელარუსის მოქალაქეების რაოდენობა“, – აღნიშნა გუძინსკაიტემ.
გასული წლის იანვარში ლიეტუვაში 86 000-ზე მეტი უკრაინელი ცხოვრობდა, წელს კი – 77 ათასზე ცოტა მეტი.
ბელარუსის მოქალაქეების რაოდენობა 62 ათასიდან 57 ათასამდე შემცირდა, ხოლო რუსეთის მოქალაქეების რაოდენობა – 15 ათასიდან 14 ათასამდე.
„რუსეთის მოქალაქეების ნახევარზე მეტი ლიეტუვაში დამოუკიდებლობის მოპოვების პერიოდიდან ცხოვრობს, ხოლო დროებითი რუსი მიგრანტების რაოდენობა 6000-ზე ოდნავ მეტია. შემაკავებელი ზომების გამო, რუსეთის მოქალაქეები ლიეტუვაში მუდმივად საცხოვრებლად პრაქტიკულად ვეღარ ჩამოდიან“, – დასძინა ეველინა გუძინსკაიტემ.