აშშ-ის პრეზიდენტმა დონალდ ტრამპმა განაცხადა, რომ ის ევროკავშირის პროდუქციაზე ტარიფებს მალე დააწესებს. ინფორმაციას BBC ავრცელებს.
„ისინი [ევროპელები] მართლა იყენებენ აშშ-ს“, – უთხრა ტრამპმა ჟურნალისტებს.
„ისინი არ ყიდულობენ ჩვენ მანქანებს, ისინი არ იღებენ ჩვენ სასოფლო-სამეურნეო პროდუქციას. ისინი არაფერს ყიდულობენ, სამაგიეროდ, ჩვენ მათგან ვიღებთ ყველაფერს – მილიონობით მანქანას, უზარმაზარი რაოდენობის საკვებსა და სასოფლო-სამეურნეო პროდუქციას“, – დასძინა ტრამპმა.
BBC-ს კითხვაზე, არსებობს თუ არა რამე ვადა, რომლის დროსაც ტარიფები იქნება შემოღებული, ტრამპმა უპასუხა: „არ ვიტყოდი, რომ რამე ვადა არსებობს, მაგრამ ეს ძალიან მალე მოხდება“.
„შეერთებული შტატები პრაქტიკულად ყველა ქვეყანამ გაძარცვა. ჩვენ თითქმის ყველა ქვეყანასთან დეფიციტი გვაქვს – ყველასთან არა, თითქმის ყველასთან. ჩვენ ეს უნდა შევცვალოთ. ეს უსამართლობაა“, – აღნიშნა აშშ-ის ლიდერმა.