ლიეტუვას ეროვნული რადიომაუწყებლის (LRT RADIO) ცნობით, ლიეტუვაში ლაზერული ტექნიკის ერთ-ერთი უმსხვილესი მწარმოებლის, კომპანია „ოპტოგამას“ თანამშრომელმა რუსეთის სამხედრო-სამრეწველო ინსტიტუტებს კომპანიის პროდუქცია ფარულად მიჰყიდა.
აღნიშნული ფაქტი კომპანიის აღმასრულებელმა დირექტორმა, ტადას ლიპინსკასმაც დაადასტურა.
„ოპტოგამას“ ლიეტუვას ლაზერული ასოციაციის წევრობა შეუჩერდა. მიმდინარეობს გამოძიება, ერთი პირი დაკავებულია.
„ფინანსური დანაშაულის გამოძიების სამსახური ამ საქმეზე წინასწარ მოკვლევას აწარმოებს. ჩვენთვის ცნობილია, რომ კომპანიის ერთ-ერთი თანამშრომელი მონაწილეობდა უკანონო ქმედებებში, რის შედეგადაც „ოპტოგამას“ მიერ წარმოებული ზოგიერთი კომპონენტი შეიძლება სანქციების ქვეშ მყოფ საწარმოებს გადასცემოდა“, – აღნიშნა ლიპინსკასმა LRT RADIO-სთვის მიცემულ ინტერვიუში.
მისივე განცხადებით, თანამშრომლის ქმედებების შესახებ კომპანიაში არაფერი იცოდნენ და ამდენად, ეს ფაქტი მენეჯმენტისთვის უსიამოვნო სიურპრიზი აღმოჩნდა. თანამშრომელი სამსახურიდან გაათავისუფლეს, მიმდინარეობს შიდა გამოძიება და კომპანია სამართალდამცავ უწყებებთან თანამშრომლობს.
ლიეტუვას ლაზერული ასოციაციის პრეზიდენტის, გედიმინას რაჩიუკაიტისის თქმით, ეს საქმე კომპანიის რეპუტაციაზე გავლენას იქონიებს.
„ოპტოგამას“ რეპუტაცია ახლა ყველაზე მნიშვნელოვანია. ჯერჯერობით ძნელი სათქმელია, ლაზერულ ტექნიკას ვინმე კომპანიის გვერდის ავლით, პირდაპირ თუ სხვა ლიეტუვური კომპანიის მეშვეობით ყიდდა“, – განუცხადა მან LRT RADIO-ს.
რამდენიმე კვირის წინ, სახელმწიფო უსაფრთხოების დეპარტამენტმა გამოთქვა ეჭვი, რომ რუსეთის მოქალაქემ, რომელსაც ლიეტუვაში დროებითი ბინადრობის ნებართვა აქვს, ორგანიზება გაუკეთა რუსეთის კვლევითი ინსტიტუტებისთვის, სამეცნიერო დაწესებულებებისა და მათთან დაკავშირებული თავდაცვის მრეწველობისა და უსაფრთხოების სტრუქტურებისთვის მაღალტექნოლოგიური აღჭურვილობის მიწოდებას.
ლიეტუვას დაზვერვის სამსახურის განმარტებით, საგამოძიებო ქმედებები ლიეტუვაში, ლატვიასა და ესტონეთში ჩატარდა და ეჭვმიტანილად 10 პირი დასახელდა.
ვილნიუსის კომპანია „ოპტოგამა“ ლაზერულ წყაროებს, ოპტიკურ სისტემებს და ლაზერულ აქსესუარებს აწარმოებს. „სოდრას“ მონაცემთა ბაზის მიხედვით, კომპანიაში 30 ადამიანია დასაქმებული.
რეესტრის ცენტრის მონაცემებიდან კი ირკვევა, რომ „ოპტოგამას“ ერთ-ერთი დამფუძნებელი და ყოფილი აქციონერი ბელარუსის მოქალაქე, ნიკოლაი კულეშოვია.
„ოპტოგამას“ ლაზერული ტექნიკა ადრე რუსეთში წარმატებით იყიდებოდა. სანქტ-პეტერბურგის კომპანია LLS ირწმუნება, რომ ის რუსეთში „ოპტოგამას“ წარმომადგენელია.