უკრაინის პრეზიდენტმა ვოლოდიმირ ზელენსკიმ განაცხადა, რომ აშშ-ს ნატოში უკრაინის მიღება არ სურს, რადგან ამან, შესაძლოა, რუსეთთან ესკალაცია გამოიწვიოს.
როგორც ზელენსკიმ მიუნხენის უსაფრთხოების კონფერენციის ფარგლებში გამართული პრესკონფერენციის დროს თქვა, აშშ-ის დღევანდელი ადმინისტრაცია დონალდ ტრამპის ხელმძღვანელობით ნატოში უკრაინის გასაწევრიანებლად არ არის მზად.
„მე ვამბობ იმას, რაც ოფიციალურად ცნობილია. ისინი [ამერიკელები] ფიქრობენ, რომ უკრაინა ნატოში ვერ იქნება, იმიტომ რომ ეს რუსეთთან ესკალაციას გამოიწვევს. ისინი ფიქრობენ, რომ უკრაინის კონსტიტუციაში ნატოზე ჩანაწერი არის ოკუპაციის მთავარი ფაქტორი“, – თქვა ზელენსკიმ.
ზელენსკიმ აგრეთვე განმარტა, რომ უკრაინას ნატოში წევრობა სურს იმიტომ, რომ ის მას და მისი უსაფრთხოების გარანტიებს ენდობა. „ვამბობ გულწრფელად და ვთვლი, რომ ეს არის ყველაზე იაფი ვარიანტი ყველასთვის. ყველაზე იაფი“, – დასძინა ზელენსკიმ.
თუმცა, თუ უკრაინა ნატოს წევრი არ გახდება, მან ევროპასთან ერთად თავდაცვის კოლექტიური სისტემა უნდა შექმნას, თქვა უკრაინის ლიდერმა.