თურქეთის პოლიციამ ქვეყნის ფარგლებში „ქურთისტანის მუშათა პარტიის“ წინააღმდეგ ჩატარებული ოპერაციის შედეგად, 282 ეჭვმიტანილი დააკავა. ამის შესახებ სოციალურ ქსელ X-ში თურქეთის შინაგან საქმეთა მინისტრი ალი იერლიკაია წერს.
მისი ცნობით, რეიდები ხუთი დღის განმავლობაში თურქეთის 51 პროვინციაში ჩატარდა. სპეცოპერაცია მიმდინარეობდა სტამბოლში, ანკარასა და დიარბაქირში. შს მინისტრის განცხადებით, ოპერაციის ფარგლებში სამართალდამცველებმა ცეცხლსასროლი იარაღის რამდენიმე ერთეული და დიდი რაოდენობით ციფრული მასალა ამოიღეს.
თურქეთის ხელისუფლება „ქურთისტანის მუშათა პარტიას“ ტერორისტულ ორგანიზაციად აღიარებს.
„ჩვენ მტკიცედ ვართ მზად, აღმოვფხვრათ ტერორიზმის ყველა ფორმა ამ მიწებზე, რათა მივაღწიოთ ჩვენს მიზანს – თურქეთს ტერორიზმის გარეშე და უზრუნველვყოთ ჩვენს ქვეყანაში მშვიდობა, ერთიანობა და სოლიდარობა“, – წერს თურქეთის შინაგან საქმეთა მინისტრი.