5 თებერვალს, პროფკავშირული გაერთიანება „ვერდის“ მიერ ორგანიზებულ დემონსტრაციაზე, 24 წლის ავღანელი თავისი მანქანით ხალხში შევარდა. ორი წლის გოგონა და მისი 37 წლის დედა იმდენად მძიმედ დაშავდნენ, რომ ორი დღის შემდეგ საავადმყოფოში გარდაიცვალნენ. სხვადასხვა ხარისხის დაზიანება, სულ მცირე, 37-მა ადამიანმა მიიღო.
როგორ შეიძლებოდა ეს მომხდარიყო, რა არის ცნობილი დანაშაულში ეჭვმიტანილ ფერჰად ნ.-ს შესახებ და რა იყო მისი ქმედების მოტივი – ყოველივე ამის დადგენას ხუთშაბათს, 20 თებერვალს, ბავარიის პარლამენტში გამართულ შინაგან საქმეთა კომიტეტის სხდომაზე ცდილობდნენ. ბავარიის „ქრისტიან-სოციალური კავშირის“ ექსპერტს შინაგან საქმეთა საკითხებში, ანდრეა ლინდჰოლცს, პირველ რიგში, იმის გარკვევა აინტერესებდა, როგორ მოხდა გარეგნულად კარგად ინტეგრირებული მიგრანტის რადიკალიზება. კომიტეტის სხდომაზე უსაფრთხოების სამსახურების წარმომადგენლებიც იყვნენ მიწვეულნი, მაგრამ მათი პასუხების მიუხედავად, საკომიტეტო მოსმენის მონაწილეთა თქმით, ბევრი რამ მაინც ბუნდოვანი რჩება. გამომძიებლები ვარაუდობენ, რომ მორწმუნე მუსლიმი ფერჰად ნ.-ს მიერ ჩადენილი დანაშაული რელიგიურ ნიადაგზე მოხდა. როგორც ჩანს, ის მხოლოდ გასული წლის შემოდგომიდან გახდა რადიკალი. ამას გამოძიების პირველი შედეგები ადასტურებს. ამჟამად ფერჰად ნ. პატიმრობაში იმყოფება.
ბავარიის უსაფრთხოების სამსახურმა ისლამური კონტენტი აღმოაჩინა
დანაშაულში ეჭვმიტანილის ტელეფონში არსებული ინფორმაცია ბოლომდე არ არის შესწავლილი. საკომიტეტო სხდომის შემდეგ გავრცელებული ინფორმაციით, ამას, შესაძლოა, კვირები დასჭირდეს. ბავარიის პარლამენტში ჩატარებულ სხდომას, შინაგან საქმეთა ფედერალური მინისტრის, ნენსი ფეზერის გარდა, მიუნხენის მერი, დიტერ რეიტერი და ბავარიის შინაგან საქმეთა მინისტრი, იოახიმ ჰერმანიც ესწრებოდნენ. დანაშაულის მოტივების შესახებ პირველი ინფორმაციაც ბავარიიდან მოვიდა: ბავარიის უსაფრთხოების სამსახურების ცნობით, თავდამსხმელის მობილურ ტელეფონში „ისლამური შინაარსის უამრავი ფოტო და ვიდეო მასალა ინახება“.
ფერჰად ნ. ორჯერ შემოწმდა
კიდევ ერთი კითხვა ფარჰად ნ.-სთან დაკავშირებით სპეცსამსახურის დასკვნებიდან გამომდინარეობს. ბავარიის კონსტიტუციის დაცვის სახელმწიფო დეპარტამენტმა 24 წლის ახალგაზრდა ორჯერ შეამოწმა. პირველად ეს 2021 წელს მოხდა, მეორედ კი – 2023 წელს. ასეთი კონტროლი „საიმიგრაციო შემოწმების“ და „უსაფრთხოების მიზნით ბიოგრაფიის შემოწმების“ ნაწილად მიიჩნევა. ფერჰად ნ. დაცვის კომპანიაში მაღაზიის დეტექტივად მუშაობდა, რაც სანდოობის შემოწმებას საჭიროებდა. თუმცა, კონსტიტუციის დაცვის სახელმწიფო ადმინისტრაციას „ამ პირის შესახებ ინფორმაცია არ ჰქონდა“.
ახალგაზრდა მიგრანტი დიდი ხნის განმავლობაში შეუმჩნეველი იყო
სხდომის დროს არაერთხელ ითქვა, რომ ფერჰად ნ. რელიგიურია, ლოცულობს და რეგულარულად სტუმრობს მეჩეთს, რომელიც, პროკურატურის ინფორმაციით, ექსტრემისტული მქადაგებლებით არ გამოირჩეოდა. ახალგაზრდა ავღანელმა საშუალო სკოლა დაამთავრა და საცალო ვაჭრობის საქმის შესწავლა დაიწყო. ინფორმაცია იმის შესახებ, დაასრულა თუ არა მან ორწლიანი სასწავლო კურსი, საქმის მასალებში არ აღმოჩნდა.
„თავისუფალი დემოკრატიული პარტია“: განმარტებები და საარჩევნო აგიტაცია ერთმანეთში არ აურიოთ
„თავისუფალი დემოკრატიული პარტიის“ დეპუტატი, მანუელ ჰოფერლინი აცხადებს, რომ საყოველთაო არჩევნებამდე სამი დღით ადრე შინაგან საქმეთა კომიტეტის სხდომის ჩატარება შესაფერი დრო არ იყო. ის შიშობს, რომ განმარტებები და საარჩევნო აგიტაცია ერთმანეთშია არეული. ჰოფერლინის აზრით, გარდაცვლილთა ნათესავების პატივისცემის გამო, საკომიტეტო მოსმენის გამართვა საყოველთაო არჩევნებიდან რამდენიმე დღის შემდეგ აჯობებდა.
ჯერ კიდევ სხდომის ჩატარებამდე, შინაგან საქმეთა ფედერალურმა მინისტრმა ფეზერმა სავარაუდო დამნაშავეების მიმართ „მაქსიმალური სიმკაცრის გამოჩენა“ მოითხოვა, სხდომის შემდეგ კი აღნიშნა: „დაზარალებულთა ტანჯვა პროპაგანდისტული მიზნებისთვის არავითარ შემთხვევაში არ უნდა იყოს გამოყენებული“. ამ შემთხვევაში, მინიტრს ის ჰქონდა მხედველობაში, რომ გერმანიაში მცხოვრები 25 მილიონი უცხო ფესვების მქონე ადამიანი საზოგადოების განუყოფელი, ღირებული ნაწილია და საყოველთაო ეჭვის ქვეშ არავინ უნდა მოექცეს.