“ქართულ ოცნებაში” აცხადებენ, რომ ოკუპირებულ აფხაზეთში ე.წ. საპრეზიდენტო არჩევნების მეორე ტური საქართველოს სუვერენიტეტის მორიგ უხეშ დარღვევას წარმოადგენს და სამართლებრივ საფუძველს მოკლებულია.
“ქართული ოცნების” წევრის, ლადო ბოჟაძის განცხადებით, აფხაზეთი საქართველოა და მის ტერიტორიაზე ჩატარებული ნებისმიერი ე.წ. არჩევნები საქართველოს კონსტიტუციას ეწინააღმდეგება.
“აფხაზეთი საქართველოა და ბუნებრივია, დროებით ოკუპირებულ ტერიტორიაზე ჩატარებული ნებისმიერი არჩევნები ეწინააღმდეგება ჩვენი ქვეყნის კონსტიტუციას და საერთაშორისო სამართალს, ამიტომ, არც ჩვენ და არც ცივილიზებული სამყარო ამ არჩევნების შედეგების არც პირველ და არც მეორე ტურს არ ცნობს.
უნდა გავაგრძელოთ არაღიარების პოლიტიკა, ეს არის ძალიან მნიშვნელოვანი და მთავარი – მშვიდობიანი გზით შევძლოთ ჩვენი ქვეყნის გაერთიანება. ჩვენა აფხაზმა და ოსმა დებმა და ძმებმა უნდა იცოდნენ, რომ აუცილებლად მოგვიწვეს ერთიან სახელმწიფოში ცხოვრება, ოღონდ ეს გაერთიანება მოხდება მხოლოდ მშვიდობით, ყოველგვარი საბრძოლო უბედურების გარეშე.
გარე ჩარევებით მტერმა არაერთხელ მოახერხა, რომ ფიზიკურად დავპირისპირებოდით ერთმანეთს, გვქონოდა ხანგრძლივი ომი, დაგვეღვარა ერთმანეთის სისხლი, ამიტომ უკან არ დავბრუნდებით და ვიყურებით მხოლოდ მომავალში. გავაგრძელებთ ჩვენი ქვეყნის განვითარებას”, – განაცხადა ლადო ბოჟაძემ.
ცნობისთვის, ოკუპირებული აფხაზეთის დე-ფაქტო საარჩევნო კომისიის განცხადებით, ე. წ. საპრეზიდენტო არჩევნების მეორე ტურში ბადრა გუნბამ გაიმარჯვა.
გუნბამ ხმების 54%-ზე მეტი მიიღო და დე ფაქტო პრეზიდენტი გახდა.
ოკუპირებულ აფხაზეთში ე.წ. არჩევნების მეორე ტური პირველ მარტს ჩატარდა. ე.წ. არჩევნებში გამარჯვება, გუნბას რუსეთის პრეზიდენტმა მიულოცა.