კანონს იღებ იმიტომ, რომ იცოდეს ხალხმა ვინ რა თანხით მანიპულირებს. არის ეს პროგრამები ქვეყნისთვის სასარგებლო თუ არის იქითკენ მიმართული, რომ როგორმე თბილისის ქუჩებში სისხლი დაიღვაროს, – განაცხადა პარლამენტის პირველმა ვიცე-სპიკერმა გიორგი ვოლსკიმ ამერიკული „ფარას“ ანალოგის საქართველოში გადმოტანასთან დაკავშირებით.
მისი თქმით, მთავარი რესურსი იმისთვის, რომ ქვეყანა იყოს დაცული გარე ჩარევებისგან, არის გამჭვირვალობა.
„კანონს იღებ იმიტომ, რომ იცოდეს ხალხმა ვინ რა თანხით მანიპულირებს და კონკრეტულად რას აკეთებს. არის ეს პროგრამები ხალხისთვის და ქვეყნისთვის საინტერესო და სასარგებლო თუ არის იქითკენ მიმართული, რომ როგორმე თბილისის ქუჩებში სისხლი დაიღვაროს. სამწუხაროდ, მეორე ვერსია არის რეალობა. არა ერთი ადამიანი ჩამოვიდა იმ ქვეყნებიდან, საიდანაც ფინანსდება კონკრეტული არასამთავრობო ორგანიზაციები და სხვადასხვა პროგრამები იმისათვის, რათა ჩვენთან დესტაბილიზაცია იყოს გამუდმებული და შეუქცევადი ხასიათი ჰქონდეს. რა საკვირველია, ერთ-ერთი მთავარი რესურსი არის გამჭვირვალობა იმისათვის, რათა დაუპირისპირდე ასეთ საქციელს შენი ქვეყნის წინააღმდეგ“, – განაცხადა გიორგი ვოლსკიმ.
უცხოური აგენტების რეგისტრაციის აქტს პარლამენტში პირველი მოსმენით განიხილავენ. პროექტი ამერიკული „ფარას“ ზუსტი ასლია და ის ქართულ კანონმდებლობაზე მორგებული იქნება.