ჯგუფურ ძალადობაში მონაწილეობის ბრალდებით დაკავებული 11 პირი სასამართლომ კვლავ პატიმრობაში დატოვა. სხდომაზე დაკავებულების მიმართ შეფარდებული აღკვეთის ღონისძიება პატიმრობა გადაისინჯა და ძალაში დარჩა.
როგორც პროკურორები აცხადებდნენ, დაკავებულების მხრიდან მიმალვისა და ახალი დანაშაულის საფრთხე კვლავ არსებობს, რის გამოც, ისინი პატიმრობაში უნდა დარჩენილიყვნენ.
დაცვის მხარე კი ბრალდებულების აღკვეთის ღონისძიების გარეშე დატოვებას შუამდგომლობდა, სასამართლოს კი ალტერნატივის სახით გირაოს სთავაზობდნენ. რაც შეეხება მტკიცებულებათა დასაშვებობის საკითხს, ეს მომდევნო სხდომაზე გადაწყდება, რომელიც 10 მარტს გაიმართება.
„სასამართლომ მოცემულ შემთხვევაში გაიზიარა ბრალდების მხარის პოზიცია. მიუთითა, რომ არსებობდა მოცემულ შემთხვევაში ახალი დანაშაულის ჩადენის საფრთხე. დაცვის მხარე უთითებდა გარკვეულ გარემოებებზე დანაშაულის კვალიფიკაციისა, თუმცა, ბრალდების მხარემ ყველა კითხვას, ბუნებრივია, გასცა სამართლებრივი პასუხი“- განაცხადა პროკურორმა ვაჟა თოდუამ.
ადვოკატ ირაკლი ჩომახაშვილის განცხადებით კი დაცვის მხარე არ ეთანხმება იმას, რომ არსებობდა ახალი დანაშაულის ჩადენის საფრთხე. მისი თქმით, ბრალდების მხარემ ორგანიზებული დანაშაულის ვერც ერთი დამაჯერებელი მტკიცებულება ვერ წარადგინა.
ცნობისთვის, პარლამენტთან მიმდინარე საპროტესტო აქციების დროს, ჯგუფურ ძალადობაში მონაწილეობის ბრალდებით დაკავებული მსახიობის, ანდრო ჭიჭინაძის, იუმორისტ ონისე ცხადაძისა და კიდევ 9 პირის საქმე ერთ წარმოებად გაერთიანდა. დანაშაული 4-დან 6 წლამდე თავისუფლების აღკვეთას ითვალისწინებს.