ლიეტუვას გენერალურმა პროკურატურამ სასამართლოს გადასცა სისხლის სამართლის საქმე, რომლის მიხედვითაც, ლიეტუვას ორი მოქალაქე ბელარუსის სასარგებლოდ ჯაშუშობაშია ბრალდებული.
გენერალური პროკურატურის ინფორმაციით, 2022 წლის მაისში ორი ბრალდებული მინსკში გაემგზავრა, სადაც ისინი ბელარუსის სამხედრო სტრუქტურების წარმომადგენლებთან შუამავლის მეშვეობით კონტაქტებსა და შემდგომ თანამშრომლობაზე შეთანხმდნენ.
ამის შემდეგ, ერთ-ერთი ბრალდებული გასამხედროვებულ ორგანიზაციას, „ლიეტუვას მსროლელთა კავშირს“ შეუერთდა და მისი აქტიური წევრი გახდა, რათა ორგანიზაციის საქმიანობისთვის ედევნებინა თვალყური.
საინფორმაციო სააგენტო „ბიზნეს ნიუს სერვისთან“ (BNS) კომენტარი იმის შესახებ, არის თუ არა ეს პირი კვლავ ამ ორგანიზაციის წევრი, „მსროლელთა კავშირს“ ჯერ არ გაუკეთებია.
პროკურატურის ცნობით, გამომძიებლებმა შეაგროვეს საკმარისი მტკიცებულებები გონივრული ვარაუდისთვის, რომ 2023 წლის ნოემბერში დაკავებამდე, ორივე ბრალდებული ბელარუსის თავდაცვის სამინისტროს გენერალური შტაბის დაზვერვის გენერალური სამმართველოს (GRU) დავალებებს ასრულებდა.
ფულის სანაცვლოდ, ისინი ინფორმაციას, სავარაუდოდ, ლიეტუვასა და ლატვიაში აგროვებდნენ და GRU-ს გადასცემდნენ.
ბელარუსის GRU-ს წარმომადგენლები, ძირითადად, დაინტერესებულნი იყვნენ ლიეტუვას შეიარაღებული ძალების, ეროვნული თავდაცვის მოხალისეთა ძალების და ლიეტუვაში განლაგებული ნატო-ს ჯარების სამხედრო აღჭურვილობისა და შეიარაღების შესახებ ინფორმაციით.
GRU-ს ასევე აინტერესებდა, როგორ ხდებოდა ინფრასტრუქტურისა და სტრატეგიული ობიექტების დაცვა, აგრეთვე „ლიეტუვას მსროლელთა კავშირის“ საქმიანობისა და წვრთნების დეტალები.
ჯაშუშებმა ასევე შეაგროვეს ინფორმაცია ლიეტუვაში მოქმედი ბელარუსული ოპოზიციური ორგანიზაციებისა და მათი აქტივისტების შესახებ.
ისინი ასევე ავლენდნენ ლიეტუვას მოქალაქეებს, რომლებიც შეიძლებოდა GRU-ს გადაებირებინა.
მიუხედავად იმისა, რომ ინფორმაცია, რომელიც მათ ბელარუსს გადასცეს, სავარაუდოდ, გასაიდუმლოებული არ იყო, პროკურორებმა განაცხადეს, რომ „ის უცხო ქვეყნების შეიარაღებული ძალებისთვის ღირებულია როგორც სამხედრო აგრესიის გეგმების შედგენის თვალსაზრისით, ასევე ლიეტუვას სახელმწიფოს წინააღმდეგ მიმართულ სხვა საქმიანობაში გამოსაყენებლად“.
ორივე ბრალდებული ამჟამად პატიმრობაში იმყოფება. ბრალის დადასტურების შემთხვევაში, მათ 15 წლამდე თავისუფლების აღკვეთა ემუქრებათ.