დღეს გამართულ სასამართლო პროცესზე ყოფილი პრეზიდენტის მიხეილ სააკაშვილის საქმეში წარმოდგენილ მტკიცებულებებზე მოსამართლე ბადრი კოჭლამაზაშვილმა ისაუბრა. მან აღნიშნა, რომ ყოფილი პრეზიდენტის პირადი ხარჯი და მისი შვილების სწავლების საფასურის ბიუჯეტიდან დაფარვა ქვეყნის ინტერესებს არ ემსახურებოდა.
„როდესაც საქმეში წარმოდგენილია ასეულობით ათასი ლარის ხარჯი კოსმეტოლოგიური მომსახურების თაობაზე, რომელიც ჩატარებულია საზღვარგარეთის წამყვან კლინიკებში. აღნიშნული ხარჯის დაკავშირება ოკუპირებული ტერიტორიების არაღიარების პოლიტიკასთან შეუძლებელია. ის არც ქვეყნის პოპულარიზაციას ემსახურებოდა და არც ქვეყნის ინტერესებს, რამდენადაც წარმოადგენდა პირად ხარჯს.
საქმეში წარმოდგენილია მაგალითად, იმდროინდელი პრეზიდენტის შვილების სწავლების საფასურის გადახდის დამადასტურებელი დოკუმენტაცია, რომელიც საქართველოს ბიუჯეტს დაუჯდა 60 ათას ლარამდე. აღნიშნული ხარჯიც ვერ ჩაითვლება ქვეყნის ინტერესებისათვის გაღებულ ხარჯად. არც კონკურსში მიუღიათ მონაწილეობა, არც კონკურსის გზით მოუპოვებიათ საბიუჯეტო დაფინანსება და არც შემდეგ მათი დაფინანსება ხდებოდა ღიად და გამჭვირვალედ”, – განაცხადა მოსამართლემ.
მან მიხეილ სააკაშვილის განაჩენი გამოაცხადა. კერძოდ, „მიხეილ სააკაშვილი ცნობილი იქნეს დამნაშავედ სსსკ-ის 182-ე მუხლის მეორე ნაწილის „ბ“ ქვეპუნქტითა და მესამე ნაწილის „ბ“ ქვეპუნქტით ჩადენილი დანაშაულის ჩადენისთვის და სასჯელის სახედ და ზომად განესაზღვროს ცხრა წლით თავისუფლების აღკვეთა.