კეზერაშვილის მოთხოვნით დაიწყო ის, რაც მოხდა ჩემი და ჩემი კომპანიის გარშემო. სურვილი იმისა, რომ სრულად ემართა ის ბიზნესი, რომელსაც მანამდე თვითონ აკონტროლებდა ე.წ. ხუთეული. საჭირო იყო ავტოგასამართი სადგურები. ავტოგასამართი სადგურები ისე, რომ სათითოდ ეყიდა დრო უნდოდა. გამოინახა იოლი გზა, სახელისუფლებო ბერკეტის გამოყენებით ამ ქონებების ხელში ჩაგდება. ჩაგდება არ იყო რთული. ყველაფერი მათ ხელში იყო, ყველაფერს და აქედან გამომდინარე გააკეთეს ის, რაც გააკეთეს, – განაცხადა გადაცემაში „იმედი LIVE“ ბიზნესმენმა ჯემალ ლეონიძემ, რომელიც კომპანია „მაგნიტს“ ფლობდა და „ნაცმოძრაობის“ რეპრესიების მსხვერპლი გახდა.
მან დეტალურად ისაუბრა თუ რა როლი ჰქონდათ სააკაშვილის რეჟიმის მაღალჩინოსნებს მისი ქონების წართმევის საქმეში და როგორ მონაწილეობდნენ ამ სქემაში ხაზარაძე-ჯაფარიძე.
ჯემალ ლეონიძის განცხადებით, „ლელოს“ ამჟამინდელი ლიდერები მაშინ დავით კეზერაშვილის დაკვეთას ასრულებდნენ.
„ხაზარაძე -ჯაფარიძე მოქმედებდა „თიბისი ბანკის“ სახელით. ყველა ოფიციალური დოკუმენტი, რომელიც ჩვენს შორის ფორმდებოდა იყო „თიბისი ბანკის“ სახელით. მონაწილეობდა შეხვედრებზე ჯაფარიძე ყოველთვის. ხაზარაძე არ ჩანდა. ეს იყო დაკვეთა კეზერაშვილისა ხაზარაძე-ჯაფარიძის მიმართ, რომ ეს საქმე მათ უნდა შეესრულებინათ ჩემს მიმართ და ჩემი კომპანიების მიმართ. ძალა და საშუალებები არ აკლდათ იმისთვის, რომ ჩემი იზოლაცია გაეკეთებინათ, ყველა გაეჩუმებინათ და ყველაფერი ხელში ჩაეგდოთ ისე, როგორც უნდოდათ“, – განაცხადა ჯემალ ლეონიძემ.
ბიზნესმენის თქმით, პირველ შეხვედრაზე ბადრი ჯაფარიძემ ვერ მოძებნა სიტყვები თუ რა განმარტება უნდა მიეცა მისთვის და უთხრა, რომ კომპანიით დავით კეზერაშვილი და „თიბისი ბანკი“ დაინტერესდა იმის გამო, რომ ბრენდის „ფერები მოსწონდათ“.
„სხვა სიტყვა ვერ მონახა თავის ლექსიკონში და თქვა ეს, რომ ჩვენ იმიტომ გვინდა, სხვა კომპანიებიც არის, სხვასაც შეიძლება შევთავაზოთ, სხვაც შეიძლება ვიყიდოთ მაგრამ ჩვენ თქვენი გვინდა იმიტომ, რომ ფერები არის ჩვენთვის მისაღები“, – განაცხადა ჯემალ ლეონიძემ და აღნიშნა, რომ ბანკისთვის ამ ქონებებს არავითარი მნიშვნელობა არ ჰქონდა და ხაზარაძე- ჯაფარიძე ბოლომდე ასრულებდნენ კეზერაშვილის დავალებებს.
ჯემალ ლეონიძის თქმით, მისი ქონებების ხელში ჩასაგდებად ჩართული იყო მთელი სახელმწიფო მანქანა.
„ეს იყო პროკურატურა, შსს, ფინანსთა სამინისტრო. ყველა მაღალჩინოსანი მონაწილეობდა იმ სქემაში“, – განაცხადა ბიზნესმენმა.
მან გაიხსენა თუ როგორ გამოიყენეს მისი შვილი იმისთვის, რომ თავად ის დაეკავებინათ.
„ახალგაზრდა კაცი დაიბარეს გამოკითხვაზე წარმოუდგენელი გარემოებასთან დაკავშირებით. მიდიხარ გამოკითხვაზე და გეუბნებიან, რომ შენ ახალგაზრდა ქალს დახვდი კორპუსის წინ, იარაღი დაადე და აგინე იმიტომ, რომ შენ რატომ ხარ „იაღოველი“. ამას ისმენ ახალგაზრდა ადამიანი, პოლიციელი რატომ გეკითხება იმას, რაც ბუნებაში წარმოუდგენელია. ამას, რომ შეკვეთას აძლევდა ვიღაცა და ეს შეკვეთა იცოდა ხაზარაძემ და ეს შეკვეთა მოდიოდა იმიტომ, რომ მე შევეშინებინე და ჩემი ოჯახი დაეშინებინათ და მიეღწიათ იმ მიზნამდე, რასაც მიაღწიეს, ამას უნდა გამოძიება? მას მერე, რაც მე დამაკავეს ეს საქმე გაჩერდა, არავის არ დაუბარებია გამოკითხვაზე“, – განაცხადა ჯემალ ლეონიძემ.
