ახალი რეგლამენტი ზედმეტ ფორმალობებს მოხსნის და კიდევ უფრო მოქნილს, ცოცხალს გახდის საპარლამენტო ცხოვრებას, – განაცხადა რეგიონული პოლიტიკისა და თვითმმართველობის კომიტეტის თავმჯდომარემ, საპარლამენტო უმრავლესობის წევრმა, ირაკლი ქადაგიშვილმა.
“ერთი ყველაზე მნიშვნელოვანი ცვლილება, რაც ზოგადად ყველაზე უფრო მეტად საინტერესოა საზოგადოებისათვის გახლავთ ის, რომ ყველა სასესიო კვირაში საშუალება ჩნდება, რომ პარლამენტის პლენარულ სხდომაზე კითხვა-პასუხისათვის მოწვეული იყოს პრემიერ-მინისტრი, მინისტრები და სხვა ანგარიშვალდებული პირები. ეს ახალი რეგლამენტი ზედმეტ ფორმალობებს მოხსნის და კიდევ უფრო მოქნილს, ცოცხალს გახდის საპარლამენტო ცხოვრებას“, – აცხადებს ქადაგიშვილი.
საქართველოს პარლამენტის რეგლამენტში ცვლილებები შედის. ახალი რეგლამენტის პროექტი დღეს პარლამენტის ბიუროს სხდომას წარედგინება და მას მიმდინარე კვირაში განიხილავენ.
ცვლილებები მნიშვნელოვან სიახლეებს მოიცავს: იზრდება და ძლიერდება ინტერპელაციის როლი. პლენარული სხდომების ყოველ კვირას იქნება ინტერპელაციის დღე და ამავე დღეს გაიმართება დებატები ფრაქციათა მონაცვლეობითი გამოსვლით. აქტუალობას დაკარგავს და შესაბამისად, რეგლამენტში აღარ იქნება მინისტრის საათი. ამოქმედდება, აქამდე თითქმის გამოუყენებელი, „დროებითი კომისიის“ კონსტიტუციური ინსტრუმენტი. განახლდება და ქმედითად ამუშავდება სამუშაო ჯგუფების ფორმატები. ეფექტიანი გახდება საკანონმდებლო წინადადების ინსტრუმენტი. დამკვიდრდება პარლამენტის საქმიანობის ერთიანი წლიური ანგარიშის ფორმატი.