სამშვიდობო შეთანხმების პირობების ფარგლებში, დონალდ ტრამპი ვლადიმირ პუტინს უფლებას მისცემს, შეინარჩუნოს თითქმის ყველა ტერიტორია, რომელიც მან უკრაინას წაართვა. ინფორმაციას ამის შესახებ ბრიტანული გამოცემა The Telegraph-ი ავრცელებს.
როგორც გამოცემა The Telegraph-ი წერს, აღნიშნული პირობა ომის დასრულების შვიდპუნქტიანი გეგმის ნაწილია, რომელიც უკრაინას აშშ-ის მკაფიო უსაფრთხოების გარანტიის გარეშე ტოვებს. ამ საკითხზე ლონდონში ოთხშაბათს იმსჯელებენ.
შეთავაზება მოიცავს აშშ-ის მიერ ყირიმზე რუსეთის სუვერენიტეტის ოფიციალურად აღიარებას და სხვა ოკუპირებული ტერიტორიების დე ფაქტო აღიარებას.
„ეს ნიშნავს არსებული ფრონტის ხაზის გაყინვას, რაც პუტინს საშუალებას მისცემს, შეინარჩუნოს თითქმის ყველა ტერიტორია, რომელიც რუსეთმა მოიპოვა. გეგმა მოიცავს უკრაინის სასარგებლოდ რამდენიმე ცვლილებასაც. რუსეთი უარს იტყვის ორ მცირე ტერიტორიაზე, რომელიც ამჟამად მის ჯარებს უკავიათ“, – აღნიშნავს The Telegraph-ი.
ინფორმირებულმა წყარომ განაცხადა, რომ გეგმის პირველი და მეორე პუნქტები მოიცავს ცეცხლის დაუყოვნებლივ შეწყვეტას და უკრაინასა და რუსეთს შორის პირდაპირ მოლაპარაკებებს, რაც ზელენსკიმ უკვე პრინციპში მიიღო. მესამე პუნქტი უკრაინას ნატოში გაწევრიანებისგან თავის შეკავებას ავალდებულებს, თუმცა ქვეყანას ევროკავშირში გაწევრიანების თავისუფლება ექნება.
მეოთხე პუნქტი ტერიტორიულ საკითხებს ეხება, რომლის მიხედვითაც, ამერიკა ყირიმზე რუსეთის სუვერენიტეტს დე იურე აღიარებს.
გარდა ამისა, უკრაინის უდიდესი და ამჟამად რუსეთის ძალების მიერ დაკავებული ზაპოროჟიეს ატომური ელექტროსადგური ამერიკის კონტროლს დაექვემდებარება.
მეექვსე პუნქტის თანახმად, უკრაინა ხელს მოაწერს მინერალების შესახებ შეთანხმებას, რომელიც აშშ-ის კომპანიებს უკრაინის ბუნებრივ რესურსებზე წვდომას მისცემს.
მეშვიდე პუნქტი ამერიკასა და რუსეთს შორის ახალი ურთიერთობის შესაძლებლობას განიხილავს და აცხადებს, რომ აშშ-ის ყველა სანქცია მოიხსნება და ორ ქვეყანას ენერგეტიკის სფეროში თანამშრომლობის დაწყება შეეძლება.