მაშველები და სამართალდამცავები ამ დრომდე ეძებენ მტკვარში ჩავარდნილ მანქანაში მყოფ ახალგაზრდებს და მთელი დღეა სამწუხაროდ მათ ვერ მიაგნეს. როგორც ცნობილია, 25 წლამდე ასაკის ახალგაზრდები ისხდნენ “ფორდ ფუჟენის” მარკის ავტომობილში, როცა მათ მანქანას სხვა ავტომობილი დაეჯახა და ავტოსაგზაო შემთხვევის შედეგად მტკვარში გადავარდა.
შემთხვევა წუხელ, ღამის 1 საათზე მოხდა და მას შემდეგ სამძებრო სამუშაოები მიმდინარეობს. როგორც ამბობენ, მანქანაში სულ 4 ახალგაზრდა იმყოფებოდა, მაშველებმა ერთი პირის გადარჩენა შეძლეს და ამ დრომდე ეძებენ სამ ახალგაზრდას. მათ შორის ორის ვინაობა ჩვენთვის ცნობილია, ისინი ზუგდიდელი ბიჭები არიან გიგა შამუგია და უტა ელიავა.
როგორც საზოგადოებამ იცის, საჭირო გახდა მტკვარში წყლის დონის დაწევა და ამაზე ინფორმაცია შინაგან საქმეთა სამინისტრომ რამდენიმე საათის წინ გაავრცელა. “თბილისში, მტკვრის მარცხენა სანაპიროზე მომხდარი ავტოსაგზაო შემთხვევის შედეგად ავტომობილი, რომელშიც იმყოფებოდა რამდენიმე მგზავრი გადავარდა მდინარე მტკვარში. შემოსული შეტყობინების მიღებისთანავე, მეხანძრე-მაშველების მიერ დაიწყო ძებნა-შველის ღონისძიება, რის შედეგადაც შესაძლებელი გახდა წყლიდან ერთი ადამიანის უვნებლად ამოყვანა. ამ დრომდე, უწყვეტ რეჟიმში მიმდინარეობს ავტომობილში მყოფი სხვა მგზავრების მიმართ სამაშველო ღონისძიება, რომელშიც მეხანძრე-მაშველებთან ერთად ჩართულები არიან მყვინთავთა ჯგუფი, წყლის საშუალებები და ყველა შესაბამისი წყალზე სამაშველო სპეც-ტექნიკა. გვსურს საზოგადოებას ვაცნობოთ, რომ მდინარე მტკვარში მიმდინარე სამაშველო ღონისძიების ფარგლებში იგეგმება მტკვრის კალაპოტში წყლის დონის შემცირება ბუნებრივ ნიშნულამდე, რაც დაკავშირებულია წყლის მოდინების რეჟიმის დარღვევასთან. მოვუწოდებთ მოსახლეობას, გამოიჩინოთ სიფრთხილე და თავი შეიკავოთ გადაადგილებისგან ორთაჭალჰესის ქვედა ბიეფში კალაპოტის მიმდებარე ტერიტორიაზე”, – ნათქვამია უწყების განცხადებაში.
ცნობილია ისიც, რომ მტკვრის მარცხენა სანაპიროზე მომხდარი ავარის საქმეზე სამართალდამცავებმა ერთი პირი უკვე დააკავეს. ინფორმაცია უკვე გაავრცელა ამაზეც შინაგან საქმეთა სამინისტრო, `ცხელ კვალზე ჩატარებული ოპერატიული ღონისძიებებისა და საგამოძიებო მოქმედებების შედეგად, თბილისში, მტკვრის მარცხენა სანაპიროზე მომხდარ ავტოსაგზაო შემთხვევაში მონაწილე მძღოლი 2002 წელს დაბადებული ი.ს. დააკავეს. გამოძიებით დადგინდა, რომ ი.ს. – მ მისი მართვის ქვეშ არსებული ავტომობილით გადაადგილებისას, ავარიული ვითარება შეუქმნა სხვა ავტომობილს, რომლის მძღოლმაც საჭე ვერ დაიმორჩილა და მდინარე მტკვარში გადავარდა” – აცხადებენ უწყებაში. დილიდანვე ითქვა, რომ ავტომობილს, რომელიც მტკვარში გადავარდა BMW-ს მარკის ავტომობილი დაეჯახა, ეტყობა შეჯახება იმდენად ძლიერი იყო, რომ მანქანა მტკვარში გადავარდა. მტკვრის კალაპოტი დაწიეს, მუშაობენ მაშველები, მაგრამ ჯერჯერობით დაკარგულ ბიჭებს ვერ მიაგნეს. მთელი დღეა იქ დგანან ნათესავები და ელოდებიან ინფორმაციას მათი ოჯახის წევრებზე.
მძიმეა ემოციური ფონია და ყველას უჭირს მომხდარზე საუბარი. როგორც შევიტყვეთ, ბიჭები სტუდენტები და მეგობრები არიან.
“ვინც გადაარჩინეს იმან თქვა, ნაპირისაკენ მოცურავდაო, მაგრამ ის მანქანა დაეჯახაო, რომელშიც ვისხედითო, დინებას მიჰქონდაო მანქანა და იმან გადაუარაო. მერე აღარ მინახავსო. იმედია, მართლა გაცურა და საქმე შეაფარა თავი. სასწაულს ველოდებით. მართლა საოცარი ბიჭები იყვნენ, უწესიერესი ბიჭები, მესამეზე არ მაქვს ინფორმაცია, ძალიან დიდი უბედურება დატრიალდა, არ ვიცი მთელი დღეა ადგილს ვერ ვპოულობ, ძალიან განვიცდი. იქნებ მოხდეს სასწაული. გიგა შამუგიას ვიცნობ, ჩვენი ნათესავის ძმისშვილია, ჩვენს თვალწინ გაზრდილი ბიჭი. ღმერთმა ქნას გადარჩეს და სასწაული მოხდეს. ამდენი ხნის შემდეგ სასწაული თუ გადაარჩენს მას. გიგა 23 წლის არის, სტუდენტი. როგორც ვიცი, მეგობრებთან ერთად იჯდა იმ მანქანაში. ის ბიჭიც, რომელიც სასწაულად გადაურჩა სიკვდილს, ზუგდიდელია, გიგას კარგი მეგობარია. მას უთქვამს, დავინახე გიგაც ნაპირისკენ რომ მოცურავდა, მაგრამ მერე რა მოხდა არაფერი ვიციო. რომ ამბობენ, მეორეც იყო მანქანიდან გამოსული და ცურავდაო, ეს გიგა იყო. ცდილობდა თავის გადარჩენას ეტყობა, იქნებ სადმე შეაფარა თავი. სამწუხაროდ, ვერ შეძლეს დახმარება და მას შემდეგ ეძებენ. იქნებ სასწაული მოხდა. თქვენ არ იცით, როგორ გაზარდა დედამ ობლად დარჩენილი შვილები. ორი ბიჭი ჰყავს დედამისს. გიგას ერთი ძმა ჰყავს, ახლა საშინელება ტრიალებს ოჯახში. სანათესავო, ყველა თბილისშია, დგანან მტკვრის სანაპიროზე და ელოდებიან სიახლეს. ღმერთმა ქნას, გადარჩეს. ნამდვილად საშინელება დატრიალდა. არაჩვეულებრივი ბიჭია, გასულ ზაფხულს თხილს იბარებდა და ფულს აგროვებდა, რომ დედა ზედმეტად არ შეეწუხებინა და სწავლისთვის საჭირო თანხა ჰქონოდა. თბილისში სწავლობდა, ხომ სჭირდებოდა თავის რჩენა. მამამისიც ახალგაზრდა იყო რომ დაიღუპა, მოსკოვში ავარიით გარდაიცვალა. ძალიან სიმპათიური და შხვართი აღნაგობის ბიჭია გიგა. ძალიან მშრომელი. მაინც ველოდებით სასწაულს”, – ამბობს ჩვენთან საუბარში გიგას ახლობელი.
როგორც ჩვენთვის გახდა ცნობილი, მანქანაში მასთან ერთად კიდევ ორი ახალგაზრდა იყო, მათაც ამ დრომდე ეძებენ. მათგან ერთი გიგას ბავშვობის მეგობარი უტა ელიავაა, ორივე ზუგდიდელები არიან, გიგა 23 წლის არის, უტა ერთი წლით უფროსია, ძალიან კარგი მეგობრები იყვნენ. ამბობენ, რომ მესამე ახალგაზრდა, რომელსაც ეძებენ მათი სტუმარია და ბიჭებთან უცხოეთიდან იყო ჩამოსული.
უტა დაოჯახებული იყო, ორი შვილი ჰყავდა, ბედნიერად ცხოვრობდნენ და ეს რა მოხდა. დედისერთა იყო. ეს ერთი ჰყავდა და ხარობდა მისი ლამაზი ოჯახით” – აღნიშნავს ახლობელი.
სამძებრო სამუშაოები ისევ გრძელდება.
წყარო: კვირის პალიტრა