როდესაც მინავლდება პროტესტი, როდესაც ოპოზიცია არის გამოუვალ მდგომარეობაში, მაშინ ცდილობენ, რომ მსგავსი თემები წამოწიონ, – განაცხადა გადაცემაში „იმედი LIVE“ პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძემ ოპოზიციაზე და მათ უცხოელ მხარდამჭერებზე საუბრისას.
„ახლაც ხედავთ, რომ ძალიან რთულ მდგომარეობაში არიან ჩვენი ქართველი ოპონენტები, რადგან მათ უწევთ ძალიან მძიმე გადაწყვეტილების მიღებ. ეს გადაწყვეტილება არის არჩევნებში მონაწილეობა-არ მონაწილეობის საკითხი. სიმძიმე მდგომარეობს იმაში, რომ მათ დაატყდებათ ძალიან დიდი რისხვა თავისივე მოტყუებული მხარდამჭერების და ამომრჩევლების.
მე დარწმუნებული ვარ, რომ ყველა მათგანი მიიღებს არჩევნებში მონაწილეობას, მაგრამ ის რომ 7 თვის განმავლობაში ისინი ამბობდნენ, რომ არანაირ არჩევნებში აღარ მიიღებდნენ მონაწილეობას, სანამ არ გადადგებოდა ხელისუფლება, ეს იყო ტყუილი დაპირება და მათ თავიდანვე იცოდნენ, რომ ეს ტყუილი დაპირება იყო. უბრალოდ ცდილობდნენ, რომ საკუთარი მომხრეები აეყოლიებინათ იმ რადიკალური ქმედებებისთვის, რაც ქუჩებში ხდებოდა.
ახლა, როდესაც ეს მუხტი აღარ არის, ისინი იძულებული იქნებიან, რომ წავიდნენ არჩევნებზე, რადგან ჟანრის კლასიკა ამას მოითხოვს, შესაბამისად მათი გარე მეგობრებიც მისცემენ რეკომენდაციას, რომ აუცილებლად მიიღონ არჩევნებში მონაწილეობა. სხვა შემთხვევაში მათი პოლიტიკური ფასი კიდევ უფრო მეტად დავარდება, რადგან იმ პარტიას, რომელიც არც პარლამენტში და არც საკრებულოში არ არის წარმოდგენილი, არანაირი ფასი არ აქვს“, – აღნიშნა ნიკოლოზ სამხარაძემ.