რეზოლუციებით ქართველ ხალხს ვერ გააკვირვებენ, – ამის შესახებ პარლამენტის საპროცედურო საკითხთა კომიტეტის თავმჯდომარე დავით მათიკაშვილმა განაცხადა.
მისივე თქმით, იმ კავშირისგან, რომელში შემავალი პარტიებიც „ნაცმოძრაობასთან“ და სააკაშვილთან მეგობრობენ, გასაკვირი არაფერია.
„რეზოლუციებით ქართველ ხალხს ვერ გააკვირვებენ, ევროპარლამენტისგან უსამართლო და სიცრუით სავსე რეზოლუციები ვნახეთ, რასაც ე.წ. მეგობარი აქტიც დაემატა, რომელიც რეალობას აცდენილია. იმ კავშირისგან, სადაც ისეთი პარტიები შედიან, რომლებიც „ნაციონალურ მოძრაობასთან“ და მიხეილ სააკაშვილთან მეგობრობენ, გასაკვირი არაფერია. პირიქით, ყველას მოვუწოდებთ, კარგად გაეცნონ, როგორც საქართველოს პარლამენტის განცხადებას, ასევე იმ წერილს, რომელიც პრემიერ-მინისტრმა ამერიკის პრეზიდენტს გაუგზავნა. წერილში ყველა მოვლენა არგუმენტებით არის შეფასებული. ვინმეს თუ სიმართლე აინტერესებს და ისინი არ არიან დაკავშირებული „დიფ სთეითთან“, მათთვის საკმარისი იქნება, რომ საქართველოში მიმდინარე პროცესებზე სწორი ანალიზი გააკეთონ. რეზოლუციების მიღება როცა ხდება, აშკარაა ის ნეგატიური ხელი, რასაც ობიექტურობა არ უნდა მოვთხოვოთ“, – განაცხადა მათიკაშვილმა.
ცნობისთვის, „ერთიანობა – ნაციონალური მოძრაობის“ ინფორმაციით, „საერთაშორისო დემოკრატიულმა კავშირმა“ (IDU) საქართველოს შესახებ რეზოლუცია მიიღო.