ნატოში აშშ-ის ელჩმა, მეთიუ უიტაკერმა განაცხადა, რომ აშშ წლის ბოლოს ევროპელ მოკავშირეებთან დაიწყებს მოლაპარაკებებს ევროპაში ამერიკული ჯარების შემცირების თაობაზე. ინფორმაციას ამის შესახებ სააგენტო Reuters-ი ავრცელებს.
როდესაც მას სთხოვეს კომენტარის გაკეთება გავრცელებულ ინფორმაციაზე, რომ ტრამპის ადმინისტრაცია ევროპიდან ჯარების გაყვანას განიხილავს, უიტაკერმა განაცხადა, რომ „არაფერია გადაწყვეტილი“.
„ეს, რა თქმა უნდა, სამიტის [ნატოს სამიტი, რომელიც ივნისში ჰააგაში გაიმართება] შემდეგ, წლის ბოლოსკენ მოხდება, როდესაც ამ საუბრებს დავიწყებთ. ყველა ჩვენი მოკავშირე მზად არის ამისთვის“, – აღნიშნა მან.
აშშ-ის თავდაცვის მდივანმა, პიტ ჰეგსეტმა თებერვალში ნატოს მოკავშირეებს განუცხადა, რომ „მკაცრი სტრატეგიული რეალობა ხელს უშლის ამერიკის შეერთებულ შტატებს ევროპის უსაფრთხოებაზე ფოკუსირებაში“.