გიორგი [თარგამაძე] ჩასვეს მანქანაში და გაიყვანეს ტერიტორიიდან. ბოლომდე მეგონა, რომ ის ჩვენს დასანახად გაიყვანეს ამ ფორმით, – განაცხადა „იმედის“ პროდიუსერმა და ჟურნალისტმა სოფო ნიკოლაიშვილმა პარლამენტის დროებითი საგამოძიებო კომისიის სხდომაზე, სადაც 2007 წლის 7 ნოემბერს „ტელეიმედში“ სპეცდანიშნულების რაზმის შეჭრის დეტალებზე ისაუბრა.
მან, პარლამენტის დროებითი საგამოძიებო კომისიის თავმჯდომარის თეა წულუკიანის კითხვას უპასუხა, რომელმაც დეპუტატ ვიქტორ ჯაფარიძის მიერ კომისიისთვის მიწოდებული ინფორმაცია დააზუსტა. კერძოდ, როგორც დეპუტატმა აღნიშნა, „იმედში“ შეჭრის შემდეგ, მაშინ როდესაც პარლამენტის წევრები სპეცრაზმს დატყვევებული ჰყავდა, გიორგი თარგამაძე შენობიდან ისე გაიყვანეს, რომ მას ტანსაცმლის წამოღების საშუალებაც კი მისცეს.
სოფო ნიკოლაიშვილის განცხადებით, მას ბოლომდე ეგონა, რომ გიორგი თარგამაძეს დაიჭერდნენ.
„ბოლომდე მოლოდინი გვქონდა, რომ გიორგის [თარგამაძე] დაიჭერდნენ და ძალიან მეშინოდა ამის. ძალიან დიდ პატივს ვცემდით და შეკრული გუნდი ვიყავით. ჩვენ, რომ ჩამოვედით პირველ სართულზე, რაც დავინახე ეს იყო, რომ გიორგი ჩასვეს მანქანაში და გაიყვანეს ტერიტორიიდან. ბოლომდე მეგონა, რომ ის ჩვენს დასანახად გაიყვანეს ამ ფორმით“, – განაცხადა სოფო ნიკოლაიშვილმა.