„ლიეტუვას სოციალური უზრუნველყოფისა და შრომის სამინისტროს მრჩევლის კუთვნილმა კომპანიამ რუსეთში, სავარაუდოდ, მილიონობით ევროს ღირებულების დასავლური ბრენდირებული ტანსაცმელი შეიტანა და სანქციებს თავი მესამე ქვეყნების საშუალებით აირიდა“, – ნათქვამია ჟურნალისტური ცენტრის, „სიენას“ მიერ გამოქვეყნებულ საგამოძიებო მასალებში.
„სიენას“ ცნობით, კომპანია „მელინშილისმა“, რომელიც შალჩინინკაის რაიონში მდებარეობს, 2023 წლის დასაწყისიდან 2024 წლის გაზაფხულამდე, რუსეთში 4,5 მილიონ დოლარზე მეტი (დაახლოებით 3,8 მილიონი ევრო) ღირებულების ბრენდირებული ტანსაცმელი შეიტანა, რომელთა შორის არის „ნაიკის“, „ტომი ჰილფეჯერის“, „პუმას“, „კალვინ კლაინის“ და „ადიდასის“ საქონელი.
არსებული ინფორმაციით, ექსპორტი თურქეთისა და სერბეთზე გავლით განხორციელდა და პროდუქცია, საბოლოოდ, კომპანია „უმნი იმპორტს“ მიეწოდა, რომელიც რუსეთის სახელმწიფოს მიერ კონტროლირებად და დასავლეთის მიერ სანქცირებულ „სბერბანკს“ ეკუთვნის.
ევროკავშირის სანქციების თანახმად, რუსეთში საქონლის (განსაკუთრებით კი – ფუფუნების საგნების) გაყიდვა ეკრძალება ბევრ დასავლურ კომპანიას, რომლებმაც ბაზარი უკრაინაში მოსკოვის სრულმასშტაბიანი შეჭრის შემდეგ, 2022 წელს დატოვეს.
კომპანია „მელინშილისის“ ერთადერთი მფლობელია ლიეტუვას სოციალური დაცვისა და შრომის სამინისტროს (SADM) დაქვემდებარებაში მყოფი სოციალური მომსახურების ზედამხედველობის დეპარტამენტის მრჩეველი, ანტონინა მილიაუსკიენე.
„სიენასთან“ საუბრისას, მილიაუსკიენემ აღნიშნა, რომ კომპანიის საექსპორტო საქმიანობის შესახებ საქმის კურსში არ იყო და ჟურნალისტები თავის შვილთან, მინდაუგას მილიაუსკასთან გადაამისამართა, რომელმაც, თავის მხრივ, „უმნი ექსპორტთან“ კომპანიის ტრანზაქციებზე კომენტარის გაკეთებაზე უარი თქვა.
ანგარიშის თანახმად, უკრაინაში შეჭრიდან რამდენიმე თვის შემდეგ, 2022 წლის ივლისში, როდესაც საერთაშორისო კომპანიებმა რუსეთის ბაზრიდან გასვლა დაიწყეს, „მელინშილისმა“ სატვირთო და გადაზიდვების სფეროში გადაინაცვლა. მანამდე კომპანია სატყეო სექტორში საქმიანობდა.
ჟურნალისტური გამოძიება „მელინშილის“ სახელთან ასევე აკავშირებს ეგრეთ წოდებულ „პარალელურ იმპორტს“ – რუსეთის სახელმწიფოს მიერ ავტორიზებულ სქემას, რომლის მიხედვითაც დასავლური საქონლის იმპორტი ბრენდის მწარმოებლების თანხმობის გარეშე, ტრადიციული მიწოდების ჯაჭვებისა და შეზღუდვების გვერდის ავლით ხორციელდება.
ლიეტუვას რეესტრის ცენტრში წარდგენილი ფინანსური ჩანაწერები აჩვენებს, რომ 2023 წელს „მელინშილისმა“ მნიშვნელოვანი ზრდა განიცადა. მისი შემოსავლები თითქმის რვაჯერ გაიზარდა და 468 500 ევროს შეადგინა, მაშინ როდესაც წინა წელს მხოლოდ 59 600 ევრო იყო. კომპანიამ 2023 წელს 2 340 ევროს ოდენობის მოკრძალებული მოგება მიიღო, 2022 წელს კი 312 ევროს ზარალი დააფიქსირა.
ლიეტუვას სოციალური უზრუნველყოფისა და შრომის სამინისტროს „სიენას“ ანგარიშზე კომენტარი ჯერ არ გაუკეთებია.