ჩემი მეგობრები, ახალგაზრდები ზოგი გაილახა, მაგრამ ვინც გადარჩნენ დაჭერას, ევროკავშირის ოფისთან დასხდნენ საშიმშილოდ. ევროკავშირის ოფისიდან გამოვიდნენ და უთხრეს, აქეთ ნუ სხედხართ, იქითა მხარეს გადადით, გადაჯექითო, – განაცხადა ყოფილმა პოლიტპატიმარმა, დაჩი ცაგურიამ, რომელმაც 2009 წლის 15 ივნისის მშვიდობიანი აქციის დარბევის შემდეგ განვითარებული მოვლენები, პარლამენტის დროებითი საგამოძიებო კომისიის სხდომაზე გაიხსენა.
მისი თქმით, ევროკავშირის ოფისის წარმომადგენლებმა, მოშიმშილე ახალგაზრდები მეორე მხარეს, ოფისისგან ცოტა მოშორებით გადასვეს და მათთვის წყალიც კი არ მიუწოდებიათ.
„გადასვეს მეორე მხარეს, ცოტა მოშორებით რომ არ შეწუხებულიყვნენ და სასმელი წყალიც კი არ მიუწოდებიათ. ქუჩაში რამდენიმე დღე შიმშილობდნენ ეს ახალგაზრდები, რომლებსაც იქიდან ვემუდარებოდი, რომ შეეწყვიტათ შიმშილობა, რამე რომ არ მოსვლოდათ – მიშასავით კი არა, ლაკა ხოშტარიას რომ უთვლიდა, არ შეწყვიტო შიმშილობაო. ბოდიში და საპირფარეშოთი ხომ უნდა ესარგებლათ ამ ბავშვებს და ეზოშიც კი არ შეუშვეს. ვიღაც ქალბატონი იყო, რომელსაც პატარა მაღაზია ჰქონდა ჯიხურივით და იმან მაღაზიის გასაღები დაუტოვა ამ ბავშვებს, ვიცი, წესიერი ბავშვები ხართ, არაფერს მომპარავთო. ეს ახალგაზრდები მერე იქ შედიოდნენ, სარგებლობდნენ, ხელ-პირს იბანდნენ და დღე და ღამეს ათენებდნენ ევროკავშირის ოფისთან.“ – განაცხადა დაჩი ცაგურიამ.