„დიდი შვიდეულის“ წევრებმა კანადაში გამართული სამიტის ფარგლებში ერთობლივი განცხადება მიიღეს, სადაც აღნიშნულია, რომ ირანი რეგიონში არასტაბილურობისა და ტერორის მთავარი წყაროა.
„ჩვენ, „დიდი შვიდეულის“ ლიდერები ვადასტურებთ ჩვენს მხარდაჭერას ახლო აღმოსავლეთში მშვიდობისა და სტაბილურობის მიმართ. ამ კონტექსტში ჩვენ ვადასტურებთ, რომ ისრაელს თავდაცვის უფლება აქვს. ჩვენ ვადასტურებთ ისრაელის უსაფრთხოებისადმი მხარდაჭერას. ჩვენ აგრეთვე ვადასტურებთ მშვიდობიანი მოსახლეობის დაცვის აუცილებლობას. ირანი რეგიონში არასტაბილურობისა და ტერორის მთავარი წყაროა. ჩვენ თანმიმდევრულად განგვიცხადებია, რომ ირანს არ შეიძლება, რომ ჰქონდეს ბირთვული იარაღი“, – აღნიშნულია განცხადებაში.
„დიდი შვიდეულის“ წევრი სახელმწიფოები აგრეთვე გამოდიან მოწოდებით, რომ ირანის კრიზისის დასრულება ახლო აღმოსავლეთში, მათ შორის ღაზის სექტორში საომარი მოქმედებების ფართო დეესკალაციით უნდა მოხდეს.
როგორც განცხადებაშია ხაზგასმული, „დიდი შვიდეულის“ წევრები ყურადღებით დააკვირდებიან ვითარებას ენერგეტიკულ ბაზრებზე და სტაბილიზაციის უზრუნველყოფის მიზნით ერთმანეთში კოორდინირებულად იმოქმედებენ.