აშშ-ის პრეზიდენტის, დონალდ ტრამპის სპეციალური წარმომადგენელი უკრაინის საკითხებში, კიტ კელოგი მომდევნო დღეებში ბელარუსში გამგზავრებასა და პრეზიდენტ ალექსანდრე ლუკაშენკოსთან შეხვედრას გეგმავს. ინფორმაციას Reuters-ი ოთხ წყაროზე დაყრდნობით ავრცელებს.
სააგენტოს ცნობით, კელოგის ბელარუსში გამგზავრების მთავარი მიზეზი ისაა, რომ რუსეთ-უკრაინის ცეცხლის შეწყვეტის შესახებ მოლაპარაკებები ჩიხშია შესული. თუ კელოგი ლუკაშენკოს შეხვდება, ის იქნება ამერიკის ხელისუფლების უმაღლესი წარმომადგენელი, რომელიც წლების განმავლობაში ბელარუსში ჩასულა.
ვიზიტის დღის წესრიგი უცნობია, თუმცა, როგორც Reuters-ს წყარო უყვება, კელოგის ასეთ ნაბიჯს, შესაძლოა, რუსეთ-უკრაინის ომის დასრულების საქმეში ნახტომის ეფექტი ჰქონდეს. აშშ-ის სახელმწიფო დეპარტამენტს და ვაშინგტონში ბელარუსის საელჩოს ვიზიტი ოფიციალურად არ დაუდასტურებიათ.
სააგენტო იხსენებს, რომ ბოლოს ბელარუსს 2020 წელს სახელმწიფო მდივანი მაიკ პომპეო სტუმრობდა. ეს ტრამპის პირველი საპრეზიდენტო ვადის დროს მოხდა. პომპეოს ვიზიტის მთავარი მიზანი ბელარუსთან ურთიერთობების გაუმჯობესება იყო, რადგან იმ დროისთვის მინსკსა და მოსკოვს შორის ურთიერთობები დაბალ ნიშნულზე იყო.