პარლამენტში დროებით საგამოძიებო კომისიაზე ელოდებიან გიორგი გახარიას – უნდა გაირკვეს რა მოხდა ჩორჩანაში 6 წლის წინ, ჰქონდა თუ არა ადგილი საბოტაჟს და უცხო ქვეყნისთვის მტრულ საქმიანობაში დახმარებას? საქმე 2019 წელს, მაშინდელი შინაგან საქმეთა მინისტრის, გიორგი გახარიას გადაწყვეტილებას ეხება, რომლის მიხედვითაც საოკუპაციო ხაზთან საგუშაგო გაიხსნა.
ვინ იცოდა და ვინ არა გიორგი გახარიას გადაწყვეტილების შესახებ წინასწარ და დააყენა თუ არა მან ქვეყანა სამხედრო ესკალაციის წინაშე? – ეს არის კითხვები, რომელიც როგორც პარლამენტს, ისე პროკურატურას აქვს. 2019 წლის მოვლენების დროს ოკუპანტებმა 107 ჰექტარი ტყის მასივი მიიტაცეს.
ჩორჩანა-წაღვლის ტყისკენ გზას ბოლომდე ვერ გაივლით. მიზეზი, ოკუპანტების საგუშაგოა, რომელიც აქ 2019 წლიდან დგას. სწორედ 2019 წლიდან იწყება ამ სოფლებში მცხოვრებთათვის სულ სხვანაირი რეალობა – წართმეული ტყე და გადაადგილების შეზღუდული არეალი.
ტყე, რომელსაც საკუთარი ეზოსავით იცნობდნენ, იყენებდნენ საძოვრებად, შეშისთვის, სოკოს საკრეფად – ამ ყოველდღიურობაზე უკვე წარსულში საუბრობენ.
თემურ კაპანაძე 62 წელია აქ ცხოვრობს. საქონელი ისევ ჰყავს, თუმცა იმაზე ნაკლები ვიდრე 6 წლის წინ. ძროხები საძოვრად ტყეში, ძველი გზისკენ აღარ გაჰყავს, სახიფათოა. თავად მარტო, მაინც ადის. წარსულს იხსენებს. იხსენებს იმასაც, თუ როგორ გაჰყავდათ ამ ტერიტორიაზე გზა, მაგრამ 6 წლის შემდეგ ისევ არ აქვს პასუხი კითხვაზე: რა საჭირო იყო ჩორჩანაში ქართული საგუშაგო?!
თემურ კაპანაძისგან განსხვავებით საქონელი აღარ ჰყავს მის თანასოფლელ ელგუჯა ხარაზიშვილს, რომელიც 2019 წლამდე და მის შემდგომ პერიოდს იხსენებს. გვიყვება, რომ ტყის დაკარგვას, სხვა ბევრი სიკეთის დაკარგვაც მოჰყვა.
65 წლის ელგუჯა ხარაზიშვილი ამბობს, რომ ეს ტყე მისი ცხოვრების ყველა ეტაპის განუყრელი ნაწილია. ჩორჩანაში ქართული საგუშაგოს ჩადგმამ, ადგილობრივებს ბევრი ზიანი მიაყენა. არადა ჰყვებიან, რომ 2019 წლის აგვისტომდე საფრთხე არც ერთხელ არ უგრძვნიათ.
უპასუხო კითხვებს პასუხები ახლა გამოძიებამ უნდა გასცეს. ჩორჩანასა და წაღვლის მაცხოვრებლები კი ხელოვნურად შეცვლილ რეალობას ვერ ეგუებიან. აქ დაკარგული ტერიტორიების ფასიც ალბათ ყველაზე კარგად მათ ესმით. მაგრამ არ ესმით იმ ერთი გადაწყვეტილების, რომელმაც ტყე დააკარგვინათ.