„თუ ხალხს უნდა ხელისუფლების შეცვლა, არჩევნებზე მიიღებს გადაწყვეტილებას და არა ისე, რომ ვიღაც დიდმა ბიძიებმა გარედან გადაწყვიტონ შეცვალონ ხელისუფლება და მოიყვანონ მათი აგენტურა – ასე ვერ იქნება, წარმოუდგენელია. არ არის ეს სწორი ფორმა, არსებობს დემოკრატიული პროცესი – არჩევნები“, – განაცხადა დედაქალაქის მერმა კახა კალაძემ ჟურნალისტებთან საუბრისას.
მისი თქმით, ქართული სახელმწიფო დღეს ძლიერია როგორც არასდროს და დაიცავს ქვეყნის ინტერესებს.
„ჩვენ არავის ვებრძვით და არავის ვერჩით, ვიცავთ საკუთარ ქვეყანას და მის ინტერესს. რა თქმა უნდა, გვინდა ევროპასთან მეგობრობა, აშშ-თან სტრატეგიული პარტნიორობა, ურთიერთობების გადატვირთვა. ჩვენ გვინდა მხოლოდ და მხოლოდ სამართლიანობა, მეტი არაფერი. ორმაგი სტანდარტები, ძალიან დიდი ბოდიში, მაგრამ კატეგორიულად მიუღებელია. რაც ევროპისთვის არის მისაღები – თურმე იქ შეიძლება მიიღო კანონები, თუნდაც გამჭვირვალობასთან დაკავშირებით, მაგრამ საქართველოსთვის არ შეიძლება იმიტომ, რომ ხალხი გააკონტროლებს თანხებს, რომლებიც მიდის ეკლესიის წინააღმდეგ, ხმარდება რევოლუციის განხორციელებას, სახელმწიფო გადატრიალებას, სისხლისღვრას და ა.შ. ასე ვერ იქნება. დღეს ქართული სახელმწიფო ძლიერია როგორც არასდროს, დაიცავს ქვეყნის ინტერესებს და ყველაფერს გავაკეთებთ იმისთვის, რომ მშვიდობა იყოს შენარჩუნებული“, – განაცხადა კახა კალაძემ.
ამასთან, დიპლომატიური პასპორტებით სარგებლობის შეზღუდვასთან დაკავშირებით დასმული შეკითხვის საპასუხოდ, მან აღნიშნა, რომ მისთვის და მისი თანაგუნდელებისთვის პრიორიტეტი არა პირადი კომფორტი, არამედ ქვეყნის ინტერესების გატარებაა.
„არანაირი პრობლემა არ შემქმნია, ჩვეულებრივად ხვალაც მივდივარ ევროპაში. როდესაც საქმე ეხება ქვეყნის ინტერესებს, რა თქმა უნდა, ყველაზე მთავარი და მნიშვნელოვანი ჩემთვის და ჩემი თანაგუნდელებისთვის არის სამშობლო, საქართველოს ინტერესების დაცვა, ქვეყნის ინტერესების გატარება და ყველამ კარგად უნდა გაითავისოს, როგორც ქვეყნის შიგნით, ასევე ქვეყნის გარეთ, რომ საქართველო უპირველეს ყოვლისა. ეს არის პრინციპულად მნიშვნელოვანი“, – აღნიშნა თბილისის მერმა და ხაზი გაუსვა, რომ საქართველოს ხელისუფლებისთვის მიუღებელია ორმაგი სტანდარტი ევროპელი ბიუროკრატების მხრიდან.
„ჩვენ ვიცავთ საქართველოს ინტერესს. ბიუროკრატია, რომელიც არანაირ კავშირში არ არის ევროპულ ღირებულებებთან, საერთოდ აცდენილია ყველაფერს. პირდაპირ გეუბნებიან თეთრზე შავს, პირდაპირ გეუბნებიან, რომ ადგე და კედელს დაეტაკო, მაშინ როცა იცი, რომ ამით საკუთარ თავსა და ქვეყანას დააზიანებ, ეს მიუღებელია. ასევე, კატეგორიულად მიუღებელია და წარმოუდგენელი ორმაგი სტანდარტები. მოლდოვა არის საუკეთესო მაგალითი. ქვეყანა, რომელსაც ჩვენზე ადრე მისცეს კანდიდატის სტატუსი, რომელიც მთელი რიგი პარამეტრებით 20-30 წლით უკან არის საქართველოზე, რომელიც დსთ-ს წევრი ქვეყანაა და მას ჩვენზე ადრე მისცეს კანდიდატის სტატუსი“, – განაცხადა კახა კალაძემ.