ანა წითლიძისგან მოვისმინეთ აღიარება, რომ რადიკალური ოპოზიციის ფლანგზე „შავი ფული“ იხარჯება. დაადასტურა, რომ მამუკა ხაზარაძის მხრიდან ხდება ფულით მოსყიდვა პოლიტიკოსების და სხვადასხვა პარტიის, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა.
პაპუაშვილის თქმით, ეს აჩვენებს, რომ რადიკალური ოპოზიციის ფლანგზე არსებობს პოლიტიკური კორუფცია.
„ეს აღიარებაა. გუშინ ანა წითლიძისგან მოვისმინეთ აღიარება, რაზეც ჩვენ ვსაუბრობდით, რომ რადიკალური ოპოზიციის ფლანგზე „შავი ფული“ იხარჯება გარედან ლეგიტიმაციით, მხარდაჭერით. ეს არის პირდაპირ ფაქტი, რაც განაცხადა ანა წითლიძემ. მედია უნდა დაინტერესდეს და დეტალები გაარკვიოს. პირდაპირ დაადასტურა, რომ მამუკა ხაზარაძის მხრიდან ხდება ფულით მოსყიდვა პოლიტიკოსების და სხვადასხვა პარტიის, ასევე თავისი მედიის ინსტრუმენტების გამოყენებით მოსყიდვა. არაერთხელ გვსმენია სხვა პარტიებისგან, რომ მამუკა ხაზარაძე თავისი „ტვ პირველით“ აშანტაჟებს პოლიტიკოსებს და იქიდან გამომდინარე, რამდენად ლოიალურები იქნებიან მის მიმართ, ან ნეგატიურად აშუქებს მას „ტვ პირველი“, პროპაგანდისტული მედია, ან პოზიტიურად. პარტია „გირჩი“ აცხადებს ამას. ეს აჩვენებს, რომ რადიკალური ოპოზიციის ფლანგზე არსებობს პოლიტიკური კორუფცია. ანტიქართულ კამპანიაში ჩართვა, წესით, დისკომფორტი უნდა იყოს ნებისმიერი მოქალაქისთვის. ჩანს, რომ ამას აკეთებდნენ ფულის სანაცვლოდ. პოლიტიკური კორუფცია, ადამიანების მოსყიდვა ხდება მამუკა ხაზარაძის, მათ შორის, თაღლითობისთვის მსჯავრდებული ადამიანის მხრიდან, რომელსაც მილიარდ-ნახევრის წართმევა უნდოდა ქართველი ხალხისთვის ბიუჯეტიდან და ბოლოს ნახევარი მილიონი ჯარიმის გადახდა მოუწია. მათ შორის, თავად „ლელოში“ არიან ადამიანები, რომლებიც გამოირჩევიან განსაკუთრებული აგრესიულობით. ჩანს, რომ ამის უკან დგას ფინანსური ინტერესები. როგორც ანა წითლიძე ამბობს, ასე ჩემოდნებით დაატარებს თურმე „შავ ფულს“ მამუკა ხაზარაძე, რათა პოლიტიკოსები და ჟურნალისტები მოისყიდოს“, – განაცხადა შალვა პაპუაშვილმა.