პორტუგალიის კრიმინალური პოლიცია, რომელსაც იუსტიციის სამინისტრო უწევს ზედამხედველობას, ევროკავშირის პროკურატურასთან ერთად, ატარებს ფართომასშტაბიან ოპერაციას სახელწოდებით „ნექსუსი“. სამართალდამცავები „კოვიდისშემდგომი აღდგენისა და მდგრადობის ფონდიდან“ (PRR) თანხების მიღებისას სავარაუდო თაღლითობის ფაქტებს იძიებენ. 300-მდე ოპერმუშაკი 50-ზე მეტ საცხოვრებელ და არასაცხოვრებელ შენობებში აწარმოებს ჩხრეკას. ექვსი პირი უკვე დაკავებულია.
ჩხრეკა მთელი ქვეყნის მასშტაბით მიმდინარეობს: პორტუს უნივერსიტეტის რექტორატში, კოიმბრას უნივერსიტეტში, პორტუგალიის ბანკში, ქალაქ პორტუს საკონცერტო დარბაზის ადმინისტრაციულ შენობაში, კომპანია „ბრიზას“ ოფისსა და ლისაბონში მდებარე გადაუდებელი სამედიცინო დახმარების ეროვნული ინსტიტუტის (INEM) შტაბ-ბინაში.
არსებობს ეჭვი კორუფციასა და თაღლითობაში PRR-ის ფონდიდან თანხების მიღების დროს. საქმე ეხება სახელმწიფო შესყიდვების წესების დარღვევას – ქრთამის სანაცვლოდ, კომპანიებისგან კომპიუტერული სისტემების შეძენას.
უკვე დააკავეს ექვსი ადამიანი: „ბრიზას“ ინფორმაციული ტექნოლოგიების დეპარტამენტის დირექტორი, პორტუს უნივერსიტეტის თანამშრომელი და კომპანია DecUnify-ის ოთხი დირექტორი, რომლებმაც, სავარაუდოდ, დანაშაულებრივი კარტელის სქემა შექმნეს.
გავრცელებული ინფორმაციით, სქემამ პორტუგალიის სახელმწიფო ბიუჟეტსა და ევროკავშირს ათობით მილიონი ევროს ოდენობის ზარალი მიაყენა.
გამოძიებას კოორდინაციას უწევს კრიმინალური პოლიციის ჩრდილოეთის დირექტორატი, ეროვნულ და ევროკავშირის პროკურატურასთან ერთად.
გადაუდებელი სამედიცინო დახმარების ეროვნული ინსტიტუტი (INEM) ადასტურებს ლისაბონის ოფისში კრიმინალური პოლიციის წარმომადგენლების ყოფნას.
INEM აცხადებს, რომ სამართალდამცავებთან თანამშრომლობს და ყველა მოთხოვნილ ინფორმაციას აწვდის.
პორტუს უნივერსიტეტიც ადასტურებს, რომ „დღეს მას ესტუმრა კრიმინალური პოლიციის ინსპექტორთა ჯგუფი, რომლებიც აგროვებენ ინფორმაციას კომპიუტერული აღჭურვილობის შეძენასთან დაკავშირებული გამოძიების ფარგლებში, რომლის მსხვერპლი პორტუს უნივერსიტეტიც შეიძლება იყოს“.
პორტუს უნივერსიტეტიც ადასტურებს, რომ „დღეს მას ესტუმრა კრიმინალური პოლიციის ინსპექტორთა ჯგუფი, რომლებიც აგროვებენ ინფორმაციას კომპიუტერული აღჭურვილობის შეძენასთან დაკავშირებული გამოძიების ფარგლებში, რომლის მსხვერპლი პორტუს უნივერსიტეტიც შეიძლება იყოს“. პორტუს უნივერსიტეტი ასევე აცხადებს, რომ „ხელისუფლების წარმომადგენლებთან აქტიურად თანამშრომლობს, დაინტერესებულია ყველა ფაქტის ბოლომდე შესწავლით და მზად არის დახმარების გასაწევად, თუ მის რომელიმე თანამშრომელს ბრალს წაუყენებენ“.
პორტუგალიის ტელე-რადიო მაუწყებლის (RTP) რეპორტიორმა, პორტუს უნივერსიტეტის რექტორატთან, კრიმინალური პოლიციის თანამშრომელთა აქტიური მოძრაობები დააფიქსირა.