ავიაკომპანია Air India-ს Boeing Dreamliner-ი, რომელიც ლონდონისკენ მიფრინავდა, საწვავის მიწოდებასთან პრობლემების გამო ჩამოვარდა. შესაბამისი დასკვნა ავიაკატასტროფის გამოძიების წინასწარ ანგარიშშია წარმოდგენილი.
გამოძიების მასალების მიხედვით, როგორც კი თვითმფრინავმა მაქსიმალურ სიჩქარეს მიაღწია და მიწას მოსწყდა, „საწვავის მიწოდების ჩამრთველები ძრავებისთვის 1 და 2 ერთმანეთის მიყოლებით გადავიდა მდგომარეობიდან RUN (ჩართული) მდგომარეობაში CUTOFF (გამორთული) 0.1 წამის ინტერვალით“. შავი ყუთის ჩანაწერის მიხედვით, ერთმა პილოტმა მეორეს ჰკითხა, რატომ გამორთო საწვავის მიწოდება, თუმცა მან უპასუხა, რომ ეს არ გაუკეთებია.
ამის შემდეგ პილოტებმა საწვავის მიწოდება აღადგინეს, თუმცა ძრავების მუშაობა დროულად ვერ განახლდა და თვითმფრინავი ჩამოვარდა.
ავიაკატასტროფა 12 ივნისს მოხდა. სამგზავრო თვითმფრინავი, რომელშიც 242 ადამიანი იმყოფებოდა, აფრენიდან 40 წამში სამედიცინო კოლეჯის საერთო საცხოვრებლის ტერიტორიაზე ჩამოვარდა და აფეთქდა. გადარჩა მხოლოდ ერთი მგზავრი. ასევე დაიღუპნენ ის ადამიანებიც, რომლებიც თვითმფრინავის ჩამოვარდნის ადგილზე იმყოფებოდნენ. საერთო ჯამში კატასტროფას 260-ზე მეტი ადამიანი ემსხვერპლა.